Pas 4 ditësh luftë me flakët, zjarri në masivin pyjor të Drenovës në Mallakastër ende vijon të mbetet aktiv. Mëngjesin e sotëm, 40 forca të Ushtrisë së Shqipërisë i janë bashkuar operacionit për neutralizimin e zjarrit, ndërsa ndërhyrja nga ajri ka filluar që në orën 06:00.
Në terren ka mbërritur gjithashtu Drejtori i Përgjithshëm i Agjencisë Kombëtare të Mbrojtjes Civile (AKMC), Haki Çako, i cili së bashku me autoritetet vendore ka monitoruar nga afër situatën. Në një prononcim për mediat, Çako ka theksuar se vatrat e zjarrit janë nën kontroll, ndërsa operacionet po zhvillohen në mënyrë të koordinuar nga ajri dhe toka.
Ai ka vlerësuar punën e forcave duke theksuar se është shmangur një situatë kritike veçanërisht pranë puseve të naftës dhe nënstacionit elektrik ku mund të kishte pasur pasoja të rënda. Për më tepër, Çako ka apeluar për një ashpërsim të ligjit për të gjithë ata që janë përgjegjës për zjarrvënien e qëllimshme duke theksuar se kjo është një masë e nevojshme për të parandaluar incidente të tilla në të ardhmen.
Ndërkohë, ndërhyrja nga ajri ka rifilluar rreth orës 11:00 me dy helikopterë që po kryejnë fluturime të shpeshta për shuarjen e zjarrit. Autoritetet vazhdojnë të bëjnë thirrje për kujdes të shtuar nga qytetarët dhe për raportimin e çdo vatre të mundshme zjarri në kohë.
E diplomuar në Fakultetin e Gazetarisë dhe Komunikimit në Bukuresht, në vitet 1998–2003, Marsela Topi ka ndërtuar një karrierë të gjatë dhe të qëndrueshme në fushën e medias, duke kontribuar në radio, televizione lokale dhe qendrore.
Me një përkushtim të vazhdueshëm ndaj informimit të saktë dhe profesional, ajo njihet për stilin e saj të matur, korrekt dhe të ndërtuar mbi parimin e objektivitetit gazetaresk.
Përvoja e saj shumëvjeçare është pasqyruar në mbulimin e ngjarjeve me rëndësi dhe në trajtimin e temave me ndjeshmëri publike, duke ruajtur gjithmonë integritetin dhe besueshmërinë si gazetare.
Komente