Një vatër e madhe zjarri është aktivizuar ditën e sotme në fshatin Markat, në Bashkinë Konispol duke shkaktuar djegien e një banese dhe duke rrezikuar seriozisht edhe objekte të tjera të banuara në zonë. Banorët janë larguar me urgjencë nga shtëpitë e tyre ndërsa operacionet për shuarjen e flakëve vazhdojnë në kushte tejet të vështira.
Në terren janë angazhuar zjarrfikësja e Konispolit ajo e Finiqit dhe zjarrfikësja e Sarandës si dhe dy mjete të Forcave të Armatosura. Po ashtu për të ndihmuar në situatën e krijuar janë dërguar edhe efektivë të Policisë së Sarandës.
Në kushtet e një terreni të vështirë dhe shkëmbor, mjetet zjarrfikëse kanë hasur vështirësi të mëdha për të depërtuar në lartësitë e kodrave. Shuarja e flakëve po kryhet kryesisht me mjete rrethanore ndërsa situata mbetet e rënduar për shkak të erës dhe temperaturave të larta që po ndihmojnë përhapjen e flakëve.
Autoritetet kanë apeluar për bashkëpunimin e banorëve dhe kanë kërkuar largimin e përkohshëm të të moshuarve, fëmijëve dhe të sëmurëve nga zonat e rrezikuara. Dëmet deri tani janë konsiderueshme por punimet për shuarjen e zjarrit do të vazhdojnë derisa të sigurohet se flakët janë nën kontroll. Situata mbetet jashtëzakonisht e rrezikshme dhe ekipet e emergjencës janë të angazhuara për të parandaluar çdo pasojë tjetër tragjike.
Komente