Një zjarr i përmasave të mëdha ka shpërthyer para pak minutash në pyllin me pisha shumëvjeçare në fshatin Gjinoqarë, bashkia Patos. Sipas burimeve nga banorë të fshatit dhe zjarrfikës, flakët po përhapen me shpejtësi, për shkak të erës së fortë, ndërkohë që terreni i thyer po e bën të pamundur ndërhyrjen e forcave zjarrfikëse.
Alket Halimi, shefi i zjarrfikësve të bashkisë Patos, ka konfirmuar se në vendngjarje janë dërguar 4 automjete zjarrfikëse, të cilat janë nga Patosi dhe Mallakastra. Megjithatë, ndërhyrja është shumë e vështirë, duke pasur parasysh terrenin e vështirë dhe kushte të pafavorshme. Zjarrfikësit po luftojnë me mjete rrethanore, ndërkohë që banorët e zonës dhe strukturat e bashkisë po ofrojnë gjithashtu ndihmë.
Për momentin, flakët janë të favorizuara nga era dhe vazhdojnë të avancojnë, duke shtuar frikën për përhapjen e zjarrit. Ky pyll kishte pësuar dëme edhe në vitin 2022, kur një zjarr masiv e shkatërroi pjesërisht. Sipas informacioneve të fundit, për momentin nuk ka rrezik për banesat e fshatit, pasi pylli ndodhet midis fshatrave Gjinoqarë dhe Drenie.
Përditësime të mëtejshme do të vijnë në vazhdim të operacioneve të ndërhyrjes.
E diplomuar në Fakultetin e Gazetarisë dhe Komunikimit në Bukuresht, në vitet 1998–2003, Marsela Topi ka ndërtuar një karrierë të gjatë dhe të qëndrueshme në fushën e medias, duke kontribuar në radio, televizione lokale dhe qendrore.
Me një përkushtim të vazhdueshëm ndaj informimit të saktë dhe profesional, ajo njihet për stilin e saj të matur, korrekt dhe të ndërtuar mbi parimin e objektivitetit gazetaresk.
Përvoja e saj shumëvjeçare është pasqyruar në mbulimin e ngjarjeve me rëndësi dhe në trajtimin e temave me ndjeshmëri publike, duke ruajtur gjithmonë integritetin dhe besueshmërinë si gazetare.
Komente