Reshjet e shiut në Londër kanë sjellë vonesa në nisjen e ndeshjeve të së mërkurës në Wimbledon. Organizatorët kanë bërë të ditur se nuk do të ketë lojë në fushat e jashtme para orës 11:45 me orën lokale.
Në programin e ditës janë parashikuar ndeshjet e raundit të dytë në pjesën e poshtme të shortit, me emra të mëdhenj si Carlos Alcaraz, kampioni në fuqi në dy edicionet e fundit, dhe Taylor Fritz, aktualisht i renditur i pesti në botë sipas klasifikimit të PIF ATP Rankings.
Alcaraz do të përballet me britanikun Oliver Tarvet në ndeshjen e dytë në Centre Court, që nis në orën 13:30 lokale, ndërsa Fritz do të luajë ndaj Gabriel Diallo në Court No. 1. Këto dy fusha janë të pajisura me çati tërheqëse, ndaj kalendari i tyre nuk do të ndikohet nga moti.
Ndërkohë, një ndër ndeshjet që është shtyrë për shkak të reshjeve është ajo mes talentit brazilian Joao Fonseca dhe Jenson Brooksby, e cila ishte parashikuar të hapte programin në Court 12.
Organizatorët dhe tenistët vijojnë të presin përmirësimin e kushteve, ndërsa publiku shpreson që loja të rifillojë sa më shpejt në fushat e hapura të All England Club.
Komente