Kandidati për deputet i Partisë Socialiste në qarkun Vlorë, Vullnet Sinaj, ka dalë hapur kundër qëndrimit të kryeministrit Edi Rama, duke kërkuar zyrtarisht hapjen e pamjeve filmike të procesit të numërimit të votave për Bashkinë Vlorë dhe Bashkinë Himarë gjatë zgjedhjeve parlamentare të mbajtura më 11 maj 2025.
Sinaj ka dërguar një kërkesë të formuluar zyrtarisht drejtuar kryetarit të Komisionit Qendror të Zgjedhjeve, Ilirjan Celibashi, ku thekson se ka interes të verifikojë çdo detaj të procesit të numërimit të votave për këto dy bashki. Ai sqaron se pamjet filmike do të përdoren vetëm për qëllime verifikimi dhe që çdo informacion i marrë do të trajtohet në përputhje me ligjin.
Në këtë mënyrë, Sinaj shpreh një qëndrim të kundërt me linjën zyrtare të Partisë Socialiste dhe qëndrimin e vetë kryeministrit Rama, i cili më parë është shprehur skeptik ndaj kërkesave për hapjen e kamerave në qendrat e numërimit. Kandidati i PS-së, megjithatë, argumenton se hapja e pamjeve është e drejta e çdo qytetari për informim dhe transparencë, duke iu referuar Kushtetutës, Kodit Zgjedhor dhe vendimeve të Komisionit Rregullator të Zgjedhjeve.
Ky qëndrim i Sinajt ka ngjallur reagime të ndryshme, duke theksuar nevojën për transparencë dhe mbikëqyrje të procesit zgjedhor në nivel lokal dhe kombëtar.
Komente