Një ngjarje e rëndë ka tronditur mbrëmjen e 4 gushtit në fshatin Paçram të Vaut të Dejës, ku 65-vjeçari Frrok Lleshaj u vra pasditen e djeshme, pas një atentati me armë zjarri. Lleshaj, i cili pas daljes nga burgu kishte kaluar dy vitet e fundit duke u kujdesur për bagëtitë e tij, u qëllua disa herë me pistoletë, duke i shkaktuar vdekjen në vend. Trupi i tij u gjet më vonë nga kalimtarë të rastësishëm, që alarmuan autoritetet.
Lleshaj ka qenë një emër i njohur për organet e drejtësisë, pasi ka kaluar një pjesë të madhe të jetës në burg për vrasje. Për këtë arsye, pista kryesore e hetimit lidhet me mundësinë e gjakmarrjes. Familja e viktimës ka pasur dy konflikte të hershme, të cilat dyshohen të jenë të lidhura me ngjarjen tragjike.
Në vitin 1991, djali i Frrok Lleshajt u vra në Greqi në një ngjarje të mbushur me mister, dhe dyshimet ranë mbi kushëririn e tij, Dodë Lleshaj, i cili gjithashtu u vra pak kohë pas ngjarjes. Frrok Lleshaj u akuzua për vrasjen e kushëririt, por ai e ka mohuar gjithmonë autorësinë e krimit.
Më vonë, një tjetër konflikt shpërtheu me një familje nga Puka, ku Frrok Lleshaj qëlloi për vdekje një person. Ky krim, të cilin Frroki e pranoi në gjykatë, rezultoi me një dënim prej 25 vitesh burg, të cilin ai e vuajti deri dy vite më parë.
Për këtë ngjarje, hetimet janë në zhvillim, dhe dyshimet lidhen me pasojat e këtyre konflikteve të vjetra, por deri tani nuk ka asnjë person të ndaluar. Policia ka shoqëruar disa individë që mund të kenë informacion për ngjarjen, përfshirë edhe familjarë të viktimës, por autorësia e vrasjes mbetet ende e paqartë.
Komente