Policia e Vlorës ka goditur një rast të shfrytëzimit të shtetaseve të huaja për prostitucion, duke identifikuar dhe shpallur në kërkim një shtetase kineze të dyshuar si organizatore e aktivitetit kriminal.
Operacioni u zhvillua nga specialistët për Hetimin e Trafiqeve të Paligjshme të DVP Vlorë, pas informacioneve të siguruara mbi ushtrimin e prostitucionit në një apartament të marrë me qira në lagjen “Uji i Ftohtë”.
Veprimet hetimore
U shpall në kërkim shtetasja kineze M. Y., 36 vjeçe, e dyshuar për veprën penale “Trafikimi i personave të rritur”.
U proceduan penalisht në gjendje të lirë shtetaset kineze Q. Zh., 49 vjeçe, dhe X. L., 42 vjeçe, të dyshuara për veprën penale “Ushtrimi i prostitucionit”, pasi ofronin shërbime kundrejt pagesës.
U proceduan penalisht edhe shtetasi shqiptar A. D., 38 vjeç, dhe shtetasi italian M. F., 25 vjeç, të cilët u konstatuan në ambientet ku zhvillohej aktiviteti, në rolin e klientëve.
Policia bën me dije se vijon puna për lokalizimin dhe arrestimin e organizatores së shpallur në kërkim, si dhe për dokumentimin e plotë të veprimtarisë kriminale.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente