Operacioni “Plazhi i lirë” vijon në Vlorë, duke fokusuar në lirimin e hapësirave publike të bregdetit dhe verifikimin e ligjshmërisë së aktiviteteve të subjekteve private. Gjatë këtij operacioni, janë goditur raste të pushtimit të hapësirave publike dhe janë ndaluar aktivitete të paligjshme që kanë cënuar interesin publik.
Një rast konkret ka ndodhur në zonën e “Ujit të Ftohtë”, ku shtetasi F. B. është proceduar penalisht për zënien e një hapësire publike, duke vendosur pa leje 35 çadra dhe 70 shezlongë, për përfitim të kundërligjshëm. Ky veprim ka ngjallur shqetësim, pasi shfrytëzimi pa leje i hapësirave publike është një shkelje e rregullave dhe një cenim i mundësive për pushuesit.
Në bashkëpunim me strukturat e Agjencisë Kombëtare të Bregdetit dhe Policisë Bashkiake, shërbimet e Komisariatit të Policisë Vlorë kanë realizuar kontrolle intensive në vijën bregdetare të qytetit. Pas kontrolleve, specialistët për Hetimin e Krimeve kanë referuar materialet përkatëse në Prokurori dhe kanë nisur procedimin penal ndaj shtetasit F. B. për veprën penale "Pushtimi i tokës".
Kontrollet do të vazhdojnë në të gjithë territorin bregdetar të Vlorës, me qëllim mbrojtjen e interesit publik dhe garantimin e hapësirave të lira për pushuesit, për të siguruar një sezon turistik të rregullt dhe të sigurt për të gjithë qytetarët dhe vizitorët.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente