Drejtoria Vendore e Policisë Vlorë ka dhënë detaje mbi disa ngjarje të ndodhura ditët e fundit, ku janë marrë masa ndaj disa shtetasve për vepra të ndryshme penale.
Në lidhje me rastin e “Keqtrajtimit të kafshëve” të ndodhur në parkun e Llogarasë, ku fillimisht dyshohej se ishin dëmtuar dy kuaj, verifikimet treguan se ishte dëmtuar vetëm njëri prej tyre, me plagë nga armë gjahu. Policia e Orikumit ka identifikuar autorin e dyshuar, shtetasin S. M., 55 vjeç, banues në Orikum, ndaj të cilit nisi procedimi penal. Në cilësinë e provës materiale u sekuestrua edhe një armë gjahu.
Po nga Policia e Orikumit, ka nisur procedimi penal për shtetasin E. G., 33 vjeç, banues në Dukat, i cili më 8 gusht është konfliktuar fizikisht me një 39-vjeçar, duke i shkaktuar dëmtime që kërkuan ndërhyrje mjekësore.
Në Vlorë, specialistët e Hetimit të Krimeve kanë shpallur në kërkim L. S., 38 vjeç, i dyshuar se më 7 gusht, në lagjen “24 Maji”, ka tentuar t’i vjedhë varësen një shtetaseje.
Ndërkohë, në Himarë, është proceduar penalisht N. L., 82 vjeç, i dyshuar se në fshatin Kuç ka ndezur zjarr për pastrimin e tokës së tij, i cili më pas është përhapur, duke djegur sipërfaqe me bimësi e shkurre.
Në Sarandë, gjatë kontrolleve të trafikut rrugor janë arrestuar në flagrancë:
- K. B., 25 vjeç, banues në Itali, pasi drejtonte automjetin tip “Audi” në gjendje të dehur dhe pa leje drejtimi;
- T. S., 21 vjeçe, banuese në Norvegji, pasi drejtonte automjetin tip “Seat” pa leje drejtimi.
Materialet e të gjitha rasteve janë referuar në Prokurori për veprime të mëtejshme.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente