Një hapësirë publike e zënë në mënyrë të paligjshme në lagjen “10 Korriku”, në zonën e njohur si ish “Shkolla e Marinës”, është liruar nga strukturat e Drejtorisë Vendore të Policisë Vlorë në bashkëpunim me Policinë Bashkiake.
Gjatë kontrolleve në terren, u evidentua një rast ku në hapësirën publike ishin vendosur tabela dhe trarë elektrikë, duke e kthyer atë në një parkim privat kundrejt pagesës, në kundërshtim me ligjin. Si rezultat, janë marrë masa për të liruar zonën dhe janë larguar automjetet e parkuara në mënyrë të paligjshme me anë të karrotrecit.
Në përfundim të veprimeve procedurale, është nisur procedimi penal ndaj shtetasit R. F., 44 vjeç, banues në Vlorë, i dyshuar për veprat penale “Pushtimi i tokës” dhe “Fshehja e të ardhurave”.
Po ashtu, është proceduar penalisht edhe drejtori i Policisë Bashkiake Vlorë, E. I., 30 vjeç, i dyshuar për veprën penale “Shpërdorim detyre”, pasi nuk ka vepruar për të ndaluar këtë rast të paligjshëm.
Policia e Vlorës deklaron se do të vijojë kontrollet për të garantuar përdorimin e ligjshëm të hapësirave publike dhe u bën thirrje qytetarëve të denoncojnë çdo rast të abuzimit në numrin pa pagesë 112.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente