Punimet për asfaltimin e segmentit rrugor nga Tuneli i Ujit të Ftohtë deri në fund të vilave qeveritare, pjesë e projektit Lungomare 3, kanë hyrë në fazën përfundimtare. Ky seksion ka qenë për një kohë të gjatë një pikë problematike për banorët vendas dhe vizitorët, për shkak të gjendjes së amortizuar të infrastrukturës.
Asfaltimi i kësaj rruge pritet të sjellë lehtësira të mëdha në qarkullim dhe një pamje më dinjitoze për një nga zonat më të frekuentuara gjatë sezonit turistik. Lungomare 3 është pjesë e projektit madhor të bashkisë dhe qeverisë për të rikonceptuar infrastrukturën turistike të Vlorës dhe për të lidhur qytetin me Orikumin përmes një aksi tërësisht të ri dhe bashkëkohor.
Segmenti që po shtrihet me asfalt përshkon një zonë kyçe të bregdetit, pranë vilave qeveritare dhe njësive të akomodimit, ku mungesa e rrugës së rregullt ka qenë një ndër ankesat më të përsëritura nga qytetarët dhe bizneset lokale.
Sipas projektit të miratuar, ky seksion do të pajiset edhe me ndriçim rrugor, sinjalistikë dhe gjelbërim dekorativ, duke ruajtur standardet e vendosura nga dy fazat e mëparshme të Lungomares.
Investimi është pjesë e bashkëfinancimit me Fondin Saudit për Zhvillim dhe synon të krijojë një vijë të pandërprerë lëvizjeje për këmbësorët, biçikletat dhe automjetet, duke rritur atraktivitetin e zonës për turistët dhe investitorët.
Rindërtimi i këtij aksi është një premtim i mbajtur për qytetarët e Vlorës dhe një sinjal i qartë për përkushtimin ndaj zhvillimit urban dhe turistik të qytetit.
Komente