Një 24-vjeçar është arrestuar nga Policia e Vlorës pasi dyshohet se i vuri zjarrin qëllimisht banesës së hallës së tij, për motive të dobëta.
Ngjarja ndodhi më datë 8 korrik 2025, rreth orës 15:30, në lagjen “Partizani” të qytetit të Vlorës. Menjëherë pas marrjes së njoftimit për zjarrin, shërbimet e Komisariatit të Policisë Vlorë nisën veprimet hetimore për të zbardhur rrethanat e ngjarjes.
Nga hetimet paraprake dhe pamjet filmike të siguruara në vendngjarje, rezultoi se zjarri ishte i qëllimshëm. Si pasojë, u bë i mundur identifikimi dhe arrestimi në flagrancë i autorit të dyshuar, shtetasit E. K., 24 vjeç, banues në Vlorë.
Fatmirësisht, falë ndërhyrjes në kohë të shërbimeve zjarrfikëse, flakët u neutralizuan pa shkaktuar dëme në njerëz, por vetëm dëme materiale në banesën e 56-vjeçares.
Ndaj të riut rëndon akuza për veprën penale "Shkatërrimi i pronës me zjarr", ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente