“Vetëm 8 vite për gjyshin tim!” – Mbesa shpërthen në protestë pas vendimit për autorin e vrasjes së 80-vjeçarit në Fier

Tension në ambientet e Gjykatës së Fierit, pas shpalljes së vendimit për Ilir Nukaj, i cili dhunoi për vdekje 80-vjeçarin Namik Rustemi në tetor të vitit 2024, vetëm sepse i moshuari refuzoi t’i jepte birra.

Gjykata e dënoi fillimisht të pandehurin me 12 vite burg, por për shkak të gjykimit të shkurtuar, dënimi përfundimtar u reduktua në 8 vite. Ky vendim shkaktoi reagime të forta në sallë, ku mbesa e viktimës protestoi me forcë dhe thyen xhamat e derës kryesore të gjykatës, duke e konsideruar vendimin si të padrejtë dhe të papërballueshëm për familjen.

Vrasja që tronditi Fierin
Ngjarja ndodhi më 12 tetor 2024, në fshatin Povelçë, në ambientet e jashtme të një dyqani ushqimor në pronësi të viktimës. Ilir Nukaj, 47 vjeç (i njohur edhe si Ledjan), kishte shkuar në dyqan dhe i kishte kërkuar birra të moshuarit, i cili e refuzoi për shkak të njohjes së mëparshme me precedentët e tij penalë.

Pas refuzimit, Nukaj e goditi 80-vjeçarin me grushte në kokë, duke i shkaktuar dëmtime të rënda që i morën jetën pak më vonë. Nukaj gjithashtu ushtronte dhunë edhe ndaj bashkëshortes së viktimës, 77 vjeçe, duke rënduar më tej situatën.

Ilir Nukaj u arrestua një ditë më pas. Ai ka qenë më parë i dënuar me 10 vite burg për tentativë vrasjeje, çka e bën këtë rast edhe më shqetësues për opinionin publik.

Familjarët e viktimës kanë kërkuar rishqyrtim të vendimit dhe një dënim më të ashpër për autorin, ndërsa shprehën zhgënjimin për atë që e konsiderojnë si një padrejtësi për jetën e një të moshuari të pafajshëm.

Hetimet për ngjarjen janë mbyllur dhe vendimi tashmë është shpallur i formës së prerë nga gjykata e shkallës së parë në Fier.