Banorët e lagjes Grabian, në fshatin Llakatund të Vlorës, kanë ngritur alarmin për një problem serioz mjedisor që po rrezikon shëndetin e komunitetit. Pas një sinjalizimi të ardhur në redaksinë e Blu Televizion, ekipi ynë verifikoi nga afër situatën, ku u konstatua se ujërat e zeza të disa banesave derdhen lirshëm në një kanal të hapur pranë rrugës kryesore të fshatit.
Pamjet filmike konfirmojnë ndotjen: uji i ndotur rrjedh në mënyrë të vazhdueshme, duke krijuar një mjedis të papërshtatshëm, me erë të rëndë dhe potencial të lartë për përhapjen e infeksioneve, veçanërisht në temperaturat e larta të verës.
Banorët kërkojnë zgjidhje të menjëhershme dhe i bëjnë thirrje administratorit të njësisë vendore, zotit Birce Aliraj, që të marrë përgjegjësinë për situatën dhe të ndërhyjë pa vonesë për pastrimin dhe rehabilitimin e kanalit, si dhe për ndërtimin e një sistemi të rregullt të kanalizimeve.
Ky problem mjedisor kërkon reagim të shpejtë nga strukturat përkatëse, pasi po rrezikon cilësinë e jetës dhe shëndetin publik në një zonë të banuar. Banorët shprehen se janë të lodhur nga premtimet dhe duan veprime konkrete.
Elton Nika është gazetar i njohur nga Vlora, me një karrierë të gjatë në raportimin e lajmeve lokale dhe kombëtare. Aktualisht, ai kontribuon në Blu TV me kronika nga terreni dhe emisione informuese.
Komente