Një nga atraksionet më të vizituara të Gjirokastrës, Tuneli i Luftës së Ftohtë, ka regjistruar rreth 25,000 vizitorë gjatë 10-mujorit të vitit 2024, duke shënuar një rritje prej 30% krahasuar me një vit më parë. Ky vend unik historik po tërheq gjithnjë e më shumë turistë nga e gjithë Europa, të etur për të përjetuar nga afër një pjesë të historisë së errët të Shqipërisë komuniste.
I ndërtuar në fshehtësi gjatë viteve ’60–’70 nga regjimi i Enver Hoxhës, tuneli masiv në zemër të qytetit të gurit shtrihet në rreth 800 metra gjatësi dhe përmban 59–80 dhoma me funksione të ndryshme – nga hapësira për ministritë dhe gjykatat, te dhomat e gjumit, kuzhinat, repartet e filtrimit të ajrit, dekontaminimit dhe furnizimit me energji.
Ndryshe nga muzetë e modernizuar, ky bunker është lënë pothuajse i paprekur: mobiljet, pajisjet dhe atmosfera e kohës i japin vizitorit ndjesinë e kthimit pas në epokën e Luftës së Ftohtë.
Alban Matushaj, përfaqësues i Agjencisë së Trashëgimisë Kulturore, tha për BluTV se ky vit ka shënuar shifrat më të larta të vizitueshmërisë në tunel, me interes të lartë jo vetëm gjatë sezonit veror, por edhe në dimër.
Shumë turistë nga Spanja, Italia, Belgjika, Gjermania dhe Anglia zgjedhin turin udhëzues që zgjat rreth 20–30 minuta, ku shpjegohen funksionet e dhomave – nga zona e komandës te banjot e destinuara për rreth 200 persona. Për vizitorët, ky udhëtim nuk është vetëm një shëtitje në një muze, por një përballje e drejtpërdrejtë me emocionet dhe frikën e një epoke të shkuar.
Komente