Në Davos, Presidenti amerikan Donald Trump ka mbajtur fjalën e tij në kuadër të nënshkrimeve për pjesëmarrjen në Bordin e Paqes, një iniciativë që synon përfshirjen e gjerë të vendeve në bashkëpunimin për stabilitet global. Ai u shpreh se interesi për këtë strukturë është i lartë dhe se shumë shtete kanë reaguar pozitivisht ndaj ftesës.
Trump theksoi se drejtimi i Bordit të Paqes mbështetet nga një grup liderësh të rinj dhe se vendet pjesëmarrëse kanë treguar gatishmëri të menjëhershme për t’u bërë pjesë. Sipas tij, atmosfera e takimeve në Davos ka qenë pozitive dhe bashkëpunuese.
Në vlerësimin e bilancit të presidencës së tij, Trump deklaroi se ka dhënë fund tetë luftërave në botë dhe se një vit më parë situata globale ishte shumë më e tensionuar. Ai përmendi si arritje rindërtimin e ushtrisë amerikane dhe forcimin e saj, duke e cilësuar atë si më të fuqishmen në botë.
Presidenti amerikan u ndal edhe te çështjet e sigurisë dhe ekonomisë, duke theksuar se janë ndalur pushtime dhe veprimtari të karteleve të drogës, ndërsa treguesit ekonomikë kanë arritur nivele historike. Ai deklaroi se performanca e Shteteve të Bashkuara është më e mirë se kurrë më parë.
Në fund, Trump foli për zhvillimet në Venezuelë, duke theksuar se ndërhyrjet amerikane kanë sjellë ndryshime politike dhe se marrëdhëniet me drejtimin e ri të vendit janë pozitive, çka sipas tij ka ndikuar në përmirësimin e situatës për popullsinë atje.
Komente