Presidenti amerikan Donald Trump do të vazhdojë të mbajë nën komandën e tij Gardën Kombëtare të Kalifornisë, pasi një gjykatë apeli pezulloi përkohësisht vendimin që urdhëronte kalimin e komandës tek guvernatori i shtetit, Gavin Newsom.
Vendimi i përkohshëm u mor nga Gjykata e Apelit e Qarkut të 9-të në SHBA, duke shtyrë zbatimin e urdhrit të mëparshëm të gjyqtarit federal Charles Breyer. Në njoftim thuhej se pezullimi do të qëndrojë në fuqi “deri në një urdhër të mëtejshëm”, ndërsa seanca dëgjimore për këtë çështje është caktuar për të martën.
Ndërkohë, situata në Kaliforni dhe në gjithë vendin vijon të jetë e tensionuar. Protestat në Los Angeles kundër bastisjeve të organizuara nga administrata Trump kanë hyrë në natën e shtatë. Kryetarja e Bashkisë së Los Angeles, Karen Bass, konfirmoi se shtetrrethimi në një zonë prej 1 milje katrore në qendër të qytetit ka të ngjarë të zgjatet edhe për disa ditë të tjera.
Të shtunën priten më shumë se 1,900 protesta në gjithë SHBA-në, të organizuara nën sloganin “Pa Mbretër”, si një reagim ndaj veprimeve të cilësuara si “autoritariste” nga Presidenti Trump. Tubimet do të zhvillohen paralelisht me një paradë ushtarake që Trump do të organizojë në Washington, DC.
Në Los Angeles, policia arrestoi rreth një duzinë protestuesish të enjten mbrëma për shkelje të orës policore, megjithatë demonstratat u zhvilluan kryesisht në mënyrë paqësore, sipas raportimit të KCAL (CNN Los Angeles).
Tensione janë shënuar edhe në New Jersey. Në qendrën e emigracionit “Delaney Hall” në Newark, oficerë federalë dhe lokalë ndërhynë pas një sherri të nxitur nga mungesa e ushqimit. Ngjarja ndodhi vetëm pak javë pasi kryetari i bashkisë së Newark u arrestua në këtë qendër gjatë një përplasjeje me agjentë federalë.
Senatori demokrat Alex Padilla, i nxjerrë me forcë nga një konferencë për shtyp e Sekretares së Sigurisë Kombëtare, Kristi Noem, u bëri thirrje qytetarëve që të protestojnë në mënyrë paqësore, ndërsa përshkallëzimi i situatës në mbarë vendin mbetet një sfidë për autoritetet federale dhe vendore.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente