Nga Marjeta Mërkuri
Në një kohë kur arsimi kërkon më shumë se dijen, por edhe dinjitet, guxim dhe formim qytetar, Universiteti i Vlorës “Ismail Qemali” po shfaqet si një model i qartë për atë se si ndërtohet e ardhmja.
Tre fitore të njëpasnjëshme në garat më të rëndësishme kombëtare të mendimit kritik, drejtësisë dhe ekonomisë janë dëshmi që ky universitet është shumë më tepër se një thjesht institucion arsimor. Ai është një akademi mendimi, një qendër ku formohen qytetarët e së nesërmes.
1. Gara Kombëtare e Mendimit Kritik - "Law Competition"
Organizuar nga Halimi Foundation, kjo garë kombëtare përballi 16 universitete në një sfidë që kërkonte njohuri të thella juridike, etikë argumentimi dhe qartësi mendimi mbi temat më delikate të drejtësisë dhe shoqërisë. Ekipi i Universitetit të Vlorës, i përbërë nga studentët Kiara Muçaj, Altea Dauti dhe Bianka Kananaj, nën udhëheqjen e pedagoge Jonida Mehmetaj, u shpall fitues absolut, duke treguar se studentët e Universitetit të Vlorës jo vetëm që njohin ligjin, por e kuptojnë rolin e tij si mekanizëm shoqëror.
2. Konkursi Kombëtar i Debatit për Studentët Universitarë - "Uni Debate"
Në këtë platformë të rëndësishme të organizuar nga Liburnetik Organization me mbështetje nga Ministria e Shtetit për Rininë dhe Fëmijët, Agjencia Kombëtare e Rinisë, dhe Titan Albania, studentët e Universitetit të Vlorës: Blerina Canaj, Paola Kapllanaj, Altea Hoxhaj, Klea Hoxhaj, dhe Fatime Hodaj fituan vendin e parë mes 160 pjesëmarrësve nga 8 universitete. Me një përgatitje shembullore, ato dëshmuan se fjala, kur është e ndershme dhe e strukturuar, mund të bëhet një mjet ndikimi shoqëror.
3. Konkursi "Debating Economics" - Politikat Ekonomike dhe Shoqërore
Konkursi i organizuar nga Junior Achievement Albania, përfshinte temat më të ndërlikuara të ekonomisë, teknologjisë dhe drejtësisë sociale. Studentët Bianka Kananaj dhe Fioralba Latifaj triumfuan duke vendosur Universitetin e Vlorës në vendin e dytë kombëtar. Bianka gjithashtu u shpall folësja më e mirë e konkursit, ndërsa Fioralba mori çmimin e tretë individual.
Në zemër të këtyre sukseseve qëndron stafi akademik, si dhe një lidership i qartë dhe i qëndrueshëm nga Rektorja e Universitetit “Ismail Qemali”, Prof. Dr. Aurela Saliaj, e cila ka mbështetur çdo fitore me dinjitet dhe ka nxitur një kulturë të mendimit të lirë, etik dhe qytetar.
Këto fitore janë më shumë se momente lavdie. Ato janë një piketë për të matur vizionin dhe përkushtimin e një universiteti që rrit liderë të aftë për të menduar, folur dhe vepruar. Universiteti i Vlorës nuk është më thjesht një qendër studimi, por një hapësirë që shpërfaq kapacitetin e arsimit publik për të gjeneruar liderë të së ardhmes.
Këto fitore hapin një dritare për çdo të ri që pyet veten: “Ku mund të formohem? Si mund të jem pjesë e një brezi që bën ndryshimin?” Universiteti i Vlorës është përgjigjja.
Këto tri fitore janë shembuj të gjallë se fjala e ndershme, mendimi kritik dhe përgatitja serioze mund të të ngjisin lart. Ato janë ftesa për çdo student që nuk kërkon rrugë të lehta, por udhë të ndritura.
Nëse do të jesh pjesë e një universiteti që nuk e sheh dijen si detyrim, por si mision, Vlora të pret. Nëse beson se fjala jote mund të ndryshojë shoqërinë, Universiteti i Vlorës është vendi yt. Sepse në këtë universitet, fjala nuk është vetëm mjet komunikimi. Është akt përfaqësimi. Është drejtësi. Është vetë drita.
Komente