Theth - Shkrumbohet një lokal gjatë natës

Një ngjarje e rëndë ka tronditur zonën turistike të Thethit gjatë natës së kaluar, ku një lokal është shkrumbuar plotësisht nga flakët. Restoranti në pronësi të Petrit Gjeçajt u përfshi nga zjarri, duke shkaktuar dëme të mëdha materiale.

Banorët e zonës reaguan menjëherë dhe ndërhynë për të vënë nën kontroll flakët, duke parandaluar që zjarri të përhapej në strukturat e tjera përreth, që janë kryesisht shtëpi dhe ambiente akomoduese për turistët. Falë përpjekjeve të tyre, përveç dëmeve në lokal, nuk pati pasoja më të mëdha në zonë.

Derisa policia ka nisur hetimet për shkakun e zjarrit, mbetet ende e paqartë nëse ky incident është shkaktuar aksidentalisht apo pas një veprimi të qëllimshëm. Hetimet vazhdojnë dhe autoritetet janë në kërkim të dëshmive dhe provave për të sqaruar plotësisht ngjarjen.

Ky incident vjen në një moment kur Thethi është në fokus të mediave dhe institucioneve për shkak të një operacioni të nisur nga qeveria për prishjen e ndërtimeve pa leje në zonë. Në kuadër të këtij operacioni janë goditur kryesisht bujtinat dhe shtëpizat e ndërtuara nga banorët vendas për t’u përdorur gjatë sezonit turistik, si dhe ndërtesa të tjera akomoduese.

Operacioni u urdhërua direkt nga kryeministri dhe ka shkaktuar tensione në komunitetin lokal, i cili konsideron këto ndërhyrje si një goditje ndaj mundimeve të tyre për të zhvilluar turizmin në zonën e Thethit. Ngjarja e zjarrit shton edhe më shumë shqetësim në zonë, duke ngritur pyetje për sigurinë dhe stabilitetin e këtij destinacioni turistik në zemër të Alpeve shqiptare.