“The Guardian” - Sazani, ishulli shqiptar që do të shndërrohet në destinacion ultraluksoz nga familja Trump

Ishulli i Sazanit, i njohur për peizazhin e tij të egër, biodiversitetin dhe historinë ushtarake, pritet të marrë një tjetër jetë përmes një projekti madhor turistik të familjes Trump, raportoi gazeta britanike The Guardian.

Projekti, i prezantuar si një ndër investimet më të mëdha të turizmit luksoz në rajon, parashikon zhvillimin e një resorti të nivelit të lartë në ishullin 566 hektarësh, i pozicionuar strategjikisht në hyrje të Gjirit të Vlorës. Familja Trump – më konkretisht Ivanka Trump dhe Jared Kushner – kanë deklaruar publikisht entuziazmin e tyre për këtë projekt, duke e cilësuar Sazanin si “një xhevahir të Mesdheut”.

“Do të sjellim arkitektët më të mirë dhe markat më të njohura. Ky do të jetë një destinacion i jashtëzakonshëm,” deklaroi Ivanka Trump në një intervistë të korrikut 2024.

Zhvillimi ka marrë miratimin paraprak të qeverisë shqiptare më 30 dhjetor 2024, dhe pritet të shoqërohet me ndërtimin e një marine për jahte dhe një resort luksoz tërësisht të integruar në natyrë.

Sazani, për dekada një bazë ushtarake e izoluar, ruan ende mbetje të epokës komuniste – tunele, strehimore dhe rreth 3,600 bunkerë, që sipas projektit do të restaurohen dhe përfshihen si elementë të veçantë arkitektonikë.

Kryeministri Edi Rama e ka mbështetur publikisht projektin, duke e quajtur Sazanin një “dhuratë që nuk mund të lihet pa shfrytëzuar”. Ministrja e Turizmit, Mirela Kumbaro, thekson se Shqipëria ka nevojë për turizëm cilësor, jo masiv, dhe projekte si ky ndihmojnë në rritjen e vlerës së destinacionit.

Megjithatë, ambientalistët kanë ngritur shqetësime të mëdha, pasi Sazani ndodhet brenda Parkut Kombëtar Detar Karaburun–Sazan, zonë e mbrojtur me vlera të jashtëzakonshme natyrore. Biologu detar Olsi Nika paralajmëron për ndikimet që mund të sjellin ndërtimet, infrastruktura dhe trafiku detar në këtë ekosistem të brishtë.

Kompania zhvilluese Affinity Partners, në bashkëpunim me firmën globale të qëndrueshmërisë Arup, ka premtuar se çdo ndërhyrje do të bëhet me respekt të plotë ndaj natyrës dhe biodiversitetit të ishullit.

“Nuk po ndërtojmë vetëm luks, por po krijojmë një harmoni me natyrën dhe historinë e këtij vendi unik,” deklaroi Jared Kushner.

Projekti përfshin ndërtime të skalitura në peizazh, shtigje natyrore për vizitorët dhe elementë që do të mundësojnë eksplorimin e historisë dhe biodiversitetit të ishullit në mënyrë të kontrolluar.

Sazani, dikur simbol i izolimit komunist, mund të kthehet së shpejti në simbolin e ri të turizmit ekskluziv në Shqipëri, një udhëtim nga strehat ushtarake te resortet luksoze – me të gjitha sfidat dhe mundësitë që sjell kjo transformim.