Temperaturat ekstreme, rrezik serioz për shëndetin – Ekspertët paralajmërojnë për pasoja të rënda

Europa Jugore, përfshirë Shqipërinë, po përjeton ditë me temperatura ekstreme që tejkalojnë normat sezonale dhe përbëjnë rrezik të drejtpërdrejtë për shëndetin publik, veçanërisht për të moshuarit dhe personat me sëmundje kronike.

Në disa rajone të Spanjës, termometri ka kapërcyer shifrën 40°C, ndërsa Italia, Franca dhe Portugalia kanë vënë në gatishmëri të lartë shërbimet shëndetësore për shkak të goditjeve nga i nxehti dhe rritjes së rrezikut nga zjarret, veçanërisht në ishullin e Siçilisë dhe Greqi.

Edhe Shqipëria po përballet me një valë të gjatë të të nxehtit, e cila pritet të vijojë edhe për disa ditë të tjera. Meteorologët raportojnë temperatura mbi normalen për këtë periudhë, ndërsa autoritetet shëndetësore u bëjnë thirrje qytetarëve që të shmangin qëndrimin në diell në orët e pikut dhe të marrin masa mbrojtëse.

Cilat janë rreziqet për shëndetin?
Sipas ekspertëve, temperaturat ekstreme mund të shkaktojnë:

Përkeqësim të sëmundjeve kardiovaskulare dhe të frymëmarrjes

Djegie nga dielli dhe dehidratim të rëndë

Hipertermi, një gjendje kur trupi nuk arrin të ulë temperaturën e brendshme

Meningjit aseptik, një inflamacion i trurit që mund të shkaktohet nga nxehtësia në zonën e kokës

Veçanërisht të rrezikuar janë personat mbi 65 vjeç, të cilët e kanë më të vështirë të përshtaten me ndryshimet e menjëhershme të temperaturës.

Ekspertët: Nevojiten masa urgjente
Shkencëtarët paralajmërojnë se ndryshimet klimatike po e bëjnë motin gjithnjë e më të nxehtë dhe më të paparashikueshëm. Në Evropë, temperaturat po rriten dy herë më shpejt se mesatarja globale, çka rrit rrezikun për vdekje të parakohshme dhe pasoja shëndetësore afatgjata.

Ekspertët kërkojnë që qeveritë të ndërmarrin masa konkrete për mbrojtjen e popullsisë, si:

Përmirësimi i sistemit të paralajmërimeve për valët e të nxehtit

Hapja e hapësirave publike me ajër të kondicionuar, për personat pa akses në freskim

Edukimi i qytetarëve për masat mbrojtëse dhe shenjat paralajmëruese të goditjeve nga i nxehti

Sipas vlerësimeve, një menaxhim më i mirë i situatave me temperatura ekstreme mund të shpëtojë deri në 100 mijë jetë njerëzish në të gjithë Evropën në dekadat në vijim.

BluTV do të vijojë të informojë qytetarët për zhvillimet më të fundit dhe këshillat e specialistëve për të përballuar temperaturat përvëluese të kësaj vere.