“Storm 4” në Durrës – Goditet rrjet prostitucioni, arrestohen 4 shtetase kineze

Një operacion policor i koduar “Storm 4” ka çuar në zbardhjen dhe goditjen e një rrjeti të organizuar prostitucioni në zonën e Plazhit, në lagjen nr. 13 të Durrësit.

Operacioni u zhvillua nga Seksioni për Hetimin e Trafiqeve të Paligjshme, në bashkëpunim me Komisariatin e Policisë Durrës dhe Forcën e Posaçme “Shqiponja”, nën drejtimin e Prokurorisë së rrethit.

Pas dy javësh hetime me metoda proaktive, janë vënë në pranga katër shtetase kineze, mes tyre edhe organizatorja e dyshuar, 46-vjeçarja F. W. Në kërkim është shpallur një tjetër organizatore e dyshuar, një shtetase britanike 46 vjeçe, me banim në Mbretërinë e Bashkuar.

Sipas hetimeve, të arrestuarat kishin marrë me qira një vilë dykatëshe në zonën e Plazhit, të cilën e kishin përshtatur për ushtrimin e veprimtarisë së paligjshme. Dyshohet se shërbimet ofroheshin edhe përmes një “call center”-i nga jashtë vendit.

Në kuadër të operacionit u proceduan penalisht edhe 10 persona të tjerë – 2 gra kineze dhe 8 shtetas shqiptarë – për veprën penale “Prostitucioni”.

Gjatë kontrollit në vilë, Policia sekuestroi 6 pasaporta të shtetaseve kineze, shuma të konsiderueshme parash në euro dhe dollarë, karta banke dhe disa celularë.

Hetimet vijojnë për të identifikuar persona të tjerë të përfshirë në rrjet, i cili dyshohet se ka lidhje edhe me shtetas jashtë territorit shqiptar. Materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.