Një ngjarje e pazakontë ka ndodhur në Kavajë, ku një 28-vjeçar ka inskenuar rrëmbimin e tij për të marrë para nga babai i tij. Lubjan Camema, banues në Kavajë, njoftoi të atin se ishte rrëmbyer dhe se për lirimin e tij kërkohej një shumë parash. Për të realizuar këtë skemë mashtrimi, ai përfshiu edhe një bashkëpunëtor, Bernard Kiptiu, një 45-vjeçar nga Durrësi, i cili mori rolin e ndërmjetësit dhe u paraqit për të marrë shumën e kërkuar.
Plani i inskenuar zgjati vetëm disa orë, pasi Policia e Kavajës arriti ta zbulojë skemën dhe të vërë në pranga të dyshuarit. Pas negociatave me babain e 28-vjeçarit, Bernard Kiptiu u arrestua në flagrancë nga forcat e rendit në lagjen nr. 16 të qytetit. Vetëm pak metra më tutje, ata gjetën edhe "të rrëmbyerin", Lubjan Camema, i cili po priste të përfitonte nga mashtrimi që kishte organizuar vetë.
Shtohen dyshimet se Lubjan Camema mund të ketë përdorur automjetin e të atit për të realizuar mashtrimin, pasi dyshohet se ai kishte shitur makinën disa ditë më parë si pjesë e të njëjtës skemë.
Të dy të arrestuarit janë përballur me akuzën për mashtrim të kryer në bashkëpunim, ndërsa materialet procedurale janë referuar Prokurorisë pranë Gjykatës së Shkallës së Parë në Kavajë për hetime të mëtejshme.
Komente