Gjatë 24 orëve të fundit, Shqipëria ka raportuar gjithsej 21 vatra zjarri nga të cilat 9 mbeten ende aktive dhe 1 është në monitorim. Zjarret janë shfaqur në disa qarqe të vendit duke përfshirë: Dibër, Mat, Bulqizë, Mallakastër, Vlorë, Elbasan, Belsh, Kurbin, Devoll, Korçë, Maliq, Përmet, Shijak dhe Malësi e Madhe.
Vatrat e Aktivizuara dhe Operacionet e Shuarjes:
- Qarku Dibër
Zjarri në "Liqenin e Luleve", Parku Kombëtar Lurë, vazhdon në tre vatra me intensitet të ulët. Për shuarjen e tij ka operuar një avion Canadair nga Italia dhe janë angazhuar 30 forca ushtarake të FA-së.
- Qarku Mat
Vatra aktive në fshatin Ulëz dhe vazhdon puna për shuarjen e zjarrit në Zall Gjoçaj, ku terreni është shumë i thyer dhe e vështirëson ndërhyrjen me mjete zjarrfikëse.
- Qarku Vlorë
Zjarri i intensitetit të lartë në fshatin Sotiran (Orikum, Vlorë) ka përfshirë shkurre dhe pyje pishash. Dy avionë Canadair nga Greqia janë angazhuar për shuarjen e tij. Forcat ushtarake dhe helikopterët janë gjithashtu në terren.
- Qarku Elbasan
Puna vazhdon për shuarjen e një zjarri që ka përfshirë një pyll gështenje në fshatin Shmil, njësia administrative Labinot-Mal.
- Qarku Lezhë
Zjarri në një sipërfaqe pyjore me pisha dhe pemë lisi afër tunelit të Shkopetit po menaxhohet me ndërhyrje ajrore për të shmangur përhapjen tek banesat.
- Qarku Korçë
Zjarri në fshatin Vernik, bashkia Devoll është vënë në kontroll, ndërsa operacionet për shuarjen e tij vazhdojnë.
- Qarku Gjirokastër
Në fshatin Kosinë, Përmet, zjarri është aktiv dhe forcat janë angazhuar për shuarjen e tij. Rrezik për banesa nuk ka.
Monitorimi i Zjarrit
Zjarri në fshatin Strikçan, bashkia Bulqizë është në monitorim nga shërbimi zjarrfikës dhe autoritetet lokale.
Përpjekjet për Shuarjen e Zjarreve dhe Angazhimi i Forcave
Për shuarjen e këtyre zjarreve janë angazhuar 51 automjete zjarrfikëse dhe 684 forca operacionale. Po ashtu, pjesëmarrës në operacione kanë qenë edhe 185 forca nga Forcat e Armatosura, me 19 mjete dhe 2 helikopterë.
Kushtet Atmosferike dhe Rreziku i Zjarreve
Sipas IGJEUM, sot nuk priten reshje shiu, dhe rreziku i zjarreve mbetet i lartë në të gjitha qarqet e Shqipërisë. Në qarkun Durrës pritet një rrezik i moderuar, por në zona të lokalizuara në juglindje të tij, rreziku i zjarreve do të jetë i lartë. Ky rrezik pritet të rritet edhe gjatë ditës së nesërme.
Thirrje për Kujdes
Strukturat e mbrojtjes civile janë të angazhuara pa ndërprerje për menaxhimin dhe shuarjen e vatrave të zjarrit në gjithë territorin. Autoritetet i bëjnë thirrje qytetarëve të tregojnë kujdes të shtuar dhe të raportojnë menjëherë çdo rast të dyshimtë zjarri pranë autoriteteve përkatëse.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente