Si u kthye një shaka nga Dungeons & Dragons në një roman bestseller romantik

Një vajzë tregtari, e mbrojtur nga familja, por plot gëzim, që përpiqet të kontrollojë një shpirt zjarri brenda saj, dhe një luftëtar gjysmë-orc i pikëlluar, që si shumë orkë të tjerë ka lëkurë të gjelbër dhe brirë, bien në dashuri gjatë një udhëtimi ku ai e shoqëron për t’u martuar me një princ në një mbretëri të largët. Gjatë udhëtimit, ata përfshihen në një marrëdhënie plot pasion.

Kjo histori mund të duket si një ëndërr me ethe, por është pikërisht subjekti i “Tusk Love”, një roman romantik që hyri në listën e librave më të shitur të “New York Times” muajin e kaluar. Rruga drejt suksesit të tij është po aq e ndërlikuar sa vetë romanca që përshkruan – dhe një tjetër shembull i çuditshëm i mënyrës se si fandom-i i internetit mund të ndikojë industrinë e botimeve.

Gjithçka nisi nga “Critical Role”, një seri transmetimi live ku një grup aktorësh luanin Dungeons & Dragons. Gjatë një episodi në vitin 2018, ata improvizuan hyrjen në një librari erotike, ku “libri i ndaluar” që zgjoi më shumë vëmendje ishte “Tusk Love”.

Ishte një shaka spontane e aktorit dhe mjeshtrit të lojës, Matthew Mercer. Por fansat e serialit, të njohur si “Critters”, e adhuruan idenë dhe filluan të kërkonin me ngulm që “Tusk Love” të bëhej një libër i vërtetë.

Në ndërkohë, Dungeons & Dragons kishte fituar më shumë respekt në kulturën popullore, duke u kthyer në një formë argëtimi që tani shihej si “cool”. Kjo ndikoi në rritjen e audiencës së “Critical Role”, që tashmë kishte marrëveshje me Random House Worlds për botime zyrtare.

Kur erdhi ideja për ta kthyer “Tusk Love” në një libër të vërtetë, zgjedhja e autores ra mbi Thea Guanzon, një shkrimtare e suksesshme në zhanrin romantasy (romancë + fantazi), e cila vetë ishte fans e “Critical Role”.

Guanzon nuk kishte vetëm një sfidë krijuese – ajo duhej të ndërtonte një histori që i përshtatej universin të serialit, të shkruar si nga autorja imagjinare Matilda Merceria, dhe njëkohësisht të kënaqte si fansat e “Critical Role”, ashtu edhe lexuesit e zakonshëm të romancave fantastike.

Për Guanzon dhe ekipin, ishte e rëndësishme që libri të mos tallej me zhanrin e romancës, por të sillte një histori të vërtetë dashurie – me emocione, pasion dhe gjithçka që pret një lexues romantasy.

Pas një viti pune, “Tusk Love” u publikua më 1 korrik 2025 dhe shiti afro 10,000 kopje vetëm në javën e parë. Në mes të korrikut, arriti në vendin e katërt në listën e librave më të shitur të “New York Times”.

Për Mercer, kjo ishte një mrekulli e papritur. “Nuk do ta kisha pritur kurrë këtë! Të shohësh që njerëzit e përqafojnë këtë ide të çmendur dhe pastaj bien në dashuri me historinë – është si një profeci gazmore e përmbushur.”

Dhe për skeptikët që ende hezitojnë të lexojnë një romancë me orkë, autorja Guanzon ka një këshillë të thjeshtë: “Përqafojini brirët.”