Si të Parandaloni dhe të Menaxhoni një Sulm Paniku

Një sulm paniku është një episod i papritur dhe intensiv ankthi, i cili shpesh shoqërohet me simptoma fizike si dridhje, çorientim, marramendje, rrahje të shpejta të zemrës, gojë të thatë dhe djersitje. Megjithatë, këto simptoma nuk janë të rrezikshme, por mund të jenë shumë të frikshme, duke e bërë individin të ndihet sikur po kalon një atak në zemër ose po rrezikon jetën.

Sulmet e panikut zakonisht zgjasin nga pesë minuta deri në gjysmë ore dhe shpesh ndodhin papritur. Por, ka disa mënyra efektive për t'i menaxhuar dhe për të parandaluar ato.

Si të Menaxhoni një Sulm Paniku
Profesor Paul Salkovskis, specialist në Psikologji dhe Shkenca Komportamentale në Universitetin e Bath, thekson se është shumë e rëndësishme të mos e lini frikën e sulmit paniku t'ju mposhtë. Ai sugjeron:

Mos u friksoni nga simptomat: Thuajini vetes se simptomat janë të shkaktuara nga ankthi dhe nuk janë shenja se diçka e keqe po ndodh.

Përballuni me frikën tuaj: Duke mos i dhënë shumë rëndësi frikës, do t’i jepni mundësinë trupit tuaj të kalojë këtë periudhë.

Fokusohuni te mjedisi përreth: Pasi ankthi të kalojë, mundohuni të vazhdoni aktivitetin që po bënit më parë.

Salkovskis gjithashtu sugjeron që, nëse është e mundur, të keni dikë me vete që mund t'ju sigurojë dhe t'ju ndihmojë të kaloni më lehtë periudhën e sulmit.

Ushtrime Frymëmarrjeje për Menaxhimin e Sulmit Paniku
Një nga metodat më të thjeshta dhe efikase për të lehtësuar simptomat e sulmit paniku është ushtrimi i frymëmarrjes. Kjo është një metodë që mund të bëni gjatë sulmit:

Thithni ajër ngadalë, thellë dhe butësisht përmes hundës.

Nxirrni frymën ngadalë përmes gojës.

Mund të jetë e dobishme të numëroni nga një deri në pesë me çdo thithje dhe nxjerrje ajri.

Mbyllni sytë dhe përqendrohuni te frymëmarrja.

Duke praktikuar këto ushtrime, do të filloni të ndiheni më mirë brenda disa minutash, edhe pse mund të jeni të lodhur më pas.

Mënyra për të Parandaluar Sulmet e Panikut
Për të parandaluar një sulm paniku, Dr. Salkovskis sugjeron disa hapa:

Identifikoni shkaktarët e stresit: Kuptoni çfarë po shkakton ankthin dhe provoni të menaxhoni ato situata.

Mos e kufizoni aktivitetin tuaj të përditshëm: Aktivitetet fizike dhe ushtrimet mund të ndihmojnë në menaxhimin e stresit dhe ankthit.

Ushtrime të rregullta: Ushtrimet aerobike janë veçanërisht të dobishme për të çliruar tensionin dhe për të përmirësuar humorin.

Kujdes me ushqimin dhe pijet: Hani vakte të rregullta dhe shmangni kafeinën, alkoolin dhe cigaret, pasi ato mund ta përkeqësojnë ankthin.

Terapia njohëse e sjelljes (CBT): Kjo terapi mund të ndihmojë në ndryshimin e mendimeve dhe modeleve negative që nxisin sulmet e panikut.

A është Çrregullimi i Panikut një Çrregullim i Vërtetë?
Nëse ndiheni të stresuar dhe ankthioz gjatë gjithë kohës, mund të keni çrregullim paniku, që shoqërohet shpesh me frikën e një sulmi paniku të ardhshëm. Njerëzit me këtë çrregullim mund të shmangin situatat që mund të shkaktojnë një sulm, dhe në disa raste, mund të zhvillojnë agorafobi (frikë nga vendet publike).

Dr. Salkovskis këshillon që, nëse sulmet ndodhin shpesh dhe janë të paparashikueshme, është e rëndësishme të kërkoni ndihmë mjekësore për të adresuar këtë çrregullim.