Gjyqi për shefat e Bankers Petroleum, të akuzuar për evazion fiskal, mashtrim dhe fshehje të të ardhurave, është shtyrë për të mërkurën, më 6 gusht 2025, në orën 10:00, pasi procesi u konsiderua i ndërlikuar. Seanca u zhvillua me dyer të mbyllura dhe përfaqësuesit e ambasadës kineze në Tiranë nuk u lejuan të monitoronin gjyqin.
Hongping Xiao, i cili ka marrë drejtimin e Bankers që nga nëntori i vitit 2024, kërkoi ndryshimin e masës së arrestit të vendosur ndaj tij nga gjykata e Fierit. Sipas burimeve të pranishme, ai ka paraqitur prova të reja, ndërkohë që Leonidha Çobo, ish-drejtori i Bankers, mohoi akuzat dhe insistoi në pafajësinë e tij, duke theksuar se nuk ka kryer asnjë vepër penale.
Prokuroria e Fierit ka nisur hetimet dhe dyshon se drejtuesit e Bankers, së bashku me tetë funksionarë të tjerë, kanë krijuar skema mashtruese për të shmangur pagesën e detyrimeve tatimore ndaj shtetit shqiptar. Ata janë akuzuar gjithashtu për pastrim parash dhe shpërdorim të detyrës, ndërsa katër të tjerë që janë në kërkim përfshijnë ish-drejtues të kompanisë, të gjithë shtetas kinezë dhe një kanadez.
Prokuroria ka theksuar se, sipas hetimeve, është e pamundur që Bankers Petroleum të ketë pasur humbje financiare në vitet e fundit, pasi në vitin 2016 kompania u ka paguar drejtuesve të saj një shpërblim prej 1 milion euro. Gjithashtu, përmes një transaksioni të shitjes së kompanisë për mbi 400 milionë dollarë, Prokuroria ngre dyshime për fshehje të të ardhurave dhe për manipulimin e bilanceve financiare.
Një nga aspektet e hetimeve lidhet me dëmet që kjo kompani ka shkaktuar në Patos Marinë, ku janë dëmtuar dhjetëra banesa, sipas prokurorisë. Sipas akuzës, fitimet që kompania ka realizuar nuk janë deklaruar, ndërsa dyshohet se ato mund të jenë pastruar.
Procesi për këtë çështje vijon, dhe më shumë detaje priten gjatë seancave të ardhshme.
Komente