Cristiano Ronaldo ka lënë të hapur mundësinë e një rikthimi në futbollin evropian, duke riafirmuar ambicien e tij për të arritur shifrën historike të 1 000 golave në karrierë. Sulmuesi portugez, tashmë 40 vjeç, deklaroi se dëshiron të vazhdojë të luajë për aq kohë sa e lejon gjendja fizike dhe pa u kufizuar nga vendi ku aktivizohet.
Ronaldo e çoi numrin total të golave në 956, pasi realizoi dy herë në fitoren 3-0 të Al-Nasr ndaj Al-Ahdoud. Me këtë dygolësh, ai arriti në 40 gola vetëm gjatë vitit 2025, duke e bërë këtë vitin e 14-të kalendarik në karrierën e tij ku shënon mbi 40 gola.
Gjatë një ceremonie çmimesh të zhvilluar në Dubai, Ronaldo u shpreh se pasioni për futbollin mbetet i pandryshuar dhe se synon të vazhdojë edhe për një ose dy sezone të tjera. “Dua të ec përpara. Nuk ka rëndësi nëse luaj në Lindjen e Mesme apo në Evropë. Për sa kohë jam i shëndetshëm dhe pa dëmtime, do ta ndjek qëllimin tim”, deklaroi ai, duke iu referuar objektivit të 1 000 golave.
Portugezi ka bërë të ditur më herët se Kupa e Botës 2026 pritet të jetë turneu i fundit madhor i karrierës së tij. Megjithatë, forma aktuale dhe kontributi i vazhdueshëm me gola tregojnë se ai mbetet një faktor vendimtar në fushë.
Sezoni më produktiv i Ronaldos mbetet viti 2013, kur realizoi 63 gola në të gjitha kompeticionet me klubin dhe kombëtaren. Edhe sot, kapiteni i Portugalisë konsiderohet në gjendje shumë të mirë fizike, falë një programi rigoroz stërvitor që përfshin palestër disa herë në javë, kardio intensive, not dhe ushtrime për forcimin e muskujve.
Ronaldo ka theksuar se tërheqja nga futbolli aktiv nuk është ende e afërt, duke lënë të kuptohet se dëshiron ta mbyllë karrierën në fushë, me objektivat personalë të përmbushur dhe në nivelin më të lartë të mundshëm konkurrues.
Komente