Rikthehet furnizimi me ujë në Vlorë – UKV: Situata është rikuperuar, projekt i ri në ndërtim

Pas rreth 15 ditësh problematika me furnizimin me ujë të pijshëm, qyteti i Vlorës do të furnizohet normalisht që prej ditës së sotme.
Lajmin e ka bërë të ditur Drejtori i Ujësjellës Kanalizime Vlorë, Ermal Murati, gjatë një deklarate për mediat, ku ka kërkuar mirëkuptimin e qytetarëve për vështirësitë e javëve të fundit.

Sipas tij, lagjet më të prekura nga mungesa e ujit si Kushtrimi, Pus Mezin, Lirim, fshati Nartë dhe disa zona informale do të furnizohen tashmë në mënyrë të rregullt.
Murati shpjegoi se problemi ishte shkaktuar nga rënia e presionit të ujit, si pasojë e luhatjeve të tensionit të energjisë në pompimet, duke sjellë më pas mosfunksionimin e linjës së amortizuar të rrjetit ekzistues.

Zgjidhje afatgjatë: Linja e re e ujësjellësit gati në vitin 2026
Murati konfirmoi se po punohet për ndërtimin e një linje të re, e cila do të sjellë një zgjidhje përfundimtare të problemit të ujit në qytet.
Sipas tij, projekti pritet të përfundojë brenda gjashtëmujorit të parë të vitit të ardhshëm.

Zgjerim i rrjetit në zonat rurale: Nartë, Zvërnec, Akërni
Krahas zgjidhjes së menjëhershme në qytet, Drejtori i UKV njoftoi gjithashtu për nisjen e disa projekteve të reja infrastrukturore për furnizimin me ujë në zonat e Nartës, Zvërnecit dhe Akërnit.

Projekti 20 milionë euro: Investim i financuar nga MIE
Prej kalimit të shoqërisë së Ujësjellës-Kanalizimeve nga administrimi i Bashkisë te Ministria e Infrastrukturës dhe Energjisë, Vlorës i është akorduar një projekt me vlerë 20 milionë euro, i cili është aktualisht në proces ndërtimi dhe parashikon furnizim 24 orë me ujë të pijshëm për të gjithë qytetin.

Çështja e ujit ka qenë një ndër temat më shqetësuese për banorët e Vlorës, veçanërisht në sezonin turistik. Me përfundimin e këtij projekti, synohet jo vetëm stabilizimi i furnizimit, por edhe përmirësimi i cilësisë së jetesës në të gjithë zonën urbane dhe rurale.