Reperi i njohur amerikan Poorstacy, emri i vërtetë i të cilit është Carlito Milfort Jr., ka ndërruar jetë në moshën 26-vjeçare pas një incidenti të ndodhur të shtunën në Boca Raton, Florida. Lajmi u konfirmua nga Departamenti i Policisë lokale, ndërsa TMZ ishte i pari që raportoi tragjedinë. Autoritetet deri tani nuk kanë bërë të ditur shkakun e vdekjes, duke lënë shumë pikëpyetje mbi rrethanat e ngjarjes.
Sipas informacioneve paraprake, shpëtimtarët u thirrën me urgjencë në një hotel ku reperi qëndronte prej rreth dhjetë ditësh së bashku me bashkëshorten dhe fëmijën e tij. Ai u dërgua menjëherë në spital, por mjekët nuk arritën të shpëtonin jetën e 26-vjeçarit. Punonjës të hotelit thanë për TMZ se bëhej fjalë për një urgjencë mjekësore dhe se Poorstacy ishte i vetmi person i shtruar atë ditë në spital.
Poorstacy u bë i njohur për stilin e tij të veçantë, duke ndërthurur elemente të emo rap, hip hop-it, punk rock-ut dhe heavy metal-it. Ai arriti të krijonte një identitet artistik unik, që tërhoqi mijëra fansa dhe e vendosi mes artistëve të rinj më të komentuar të skenës alternative.
Gjatë karrierës së tij, reperi bashkëpunoi me një sërë artistësh të famshëm, mes tyre edhe bateristin legjendar të Blink-182, Travis Barker. Të dy publikuan këngët “Choose Life” dhe “Nothing Left”, që u pritën shumë mirë nga publiku.
Pas lajmit të hidhur, Travis Barker reagoi në rrjetet sociale duke ndarë një video emocionuese nga një prej performancave të tyre të përbashkëta. Ai publikoi gjithashtu një pjesë nga kënga “Choose Life”, duke e shoqëruar me fjalët prekëse:
“U prehsh në paqe, nuk do të të harrojmë kurrë.”
Vdekja e Poorstacy ka tronditur komunitetin muzikor, fansat dhe artistët që e kanë njohur nga afër, duke lënë pas një karrierë të ndërprerë shumë shpejt dhe një boshllëk të ndjeshëm në skenën alternative.
Komente