Një libër i ri i gazetarëve rusë në ekzil Roman Badanin dhe Mikhail Rubin, me titull “The Tsar Himself, How Vladimir Putin Deceived Us All”, zbulon detaje të reja për jetën private të presidentit rus Vladimir Putin. Sipas autorëve, Putini, i cili paraqitet si mbrojtës i vlerave tradicionale familjare, ka pasur gjatë viteve marrëdhënie me striptiste, prostituta dhe gra të reja të tërhequra nga pushteti i tij.
Hetimet përfshijnë historinë e Svetlana Krivonogikh, një ish-pastruese që sipas raportimeve ka pasur një vajzë me Putinin në vitin 2003. Vajza, Elizaveta ose Luiza Rozova, ka tërhequr vëmendjen për ngjashmërinë e saj të madhe me presidentin, të konfirmuar edhe nga analiza biometrike.
Në libër përmendet gjithashtu marrëdhënia e supozuar me gjimnasten olimpike Alina Kabaeva, e quajtur nga mediat “Zonja e Parë Sekrete”. Gjatë viteve në pushtet, Putini është përpjekur të mbajë jetën e tij personale jashtë vëmendjes publike, ndërsa gazetarët që kanë hetuar mbi këtë temë janë përballur me presione të forta nga autoritetet ruse.
Roman Badanin, themelues i portalit investigativ Proekt, u detyrua të largohej nga Rusia në vitin 2021 pas një bastisjeje nga shërbimi sekret FSB për një intervistë me vajzën e supozuar të Putinit. Sot ai jeton në SHBA dhe vijon hetimet për pasurinë dhe jetën personale të liderit rus.
Komente