Vlorë, 8 Korrik 2025 – Dhjetëra pronarë biznesesh përgjatë shëtitores së Lungomares në Vlorë janë mbledhur sot në një protestë kundër aksionit të autoriteteve për lirimin e hapësirave publike. Sipërmarrësit lokalë e konsiderojnë këtë nismë si të papërshtatshme për momentin, pasi ndërhyn në mënyrë të drejtpërdrejtë në aktivitetin e tyre ekonomik gjatë sezonit më të rëndësishëm të vitit.
Protestuesit kërkojnë pezullimin e menjëhershëm të aksionit, duke apeluar për ndërhyrjen e kryeministrit. Ata theksojnë se shumë prej bizneseve përdorin struktura të përkohshme si tavolina apo tenda të vendosura në trotuare dhe zona publike, për të ofruar shërbim ndaj turistëve. Sipas tyre, largimi i këtyre elementeve në këtë periudhë rrezikon seriozisht të ardhurat sezonale dhe mbijetesën ekonomike të qindra familjeve që varen nga turizmi.
“Po na heqin mundësinë për të punuar në kohën kur kemi më shumë klientë. Kjo është goditje për ne,” u shpreh një nga protestuesit.
Disa prej bizneseve kanë paralajmëruar mbylljen e përkohshme të aktivitetit në shenjë proteste, nëse nuk merren masa për të shtyrë zbatimin e vendimit deri në fund të sezonit veror.
Ndërkohë, autoritetet vendore sqarojnë se aksioni synon lirimin e hapësirave publike të zaptuara në mënyrë të paligjshme, për të përmirësuar qarkullimin e lirë të këmbësorëve dhe për të ruajtur estetikën urbane të një prej zonave më të frekuentuara nga turistët. Por koha dhe mënyra e ndërhyrjes kanë nxitur pakënaqësi të theksuar mes sipërmarrësve lokalë, duke e kthyer çështjen në një debat të nxehtë publik.
Ariola është një gazetare e re dhe energjike në ekipin e Blu TV, e njohur për qasjen e saj dinamike ndaj lajmit dhe pasionin për gazetarinë terreni. Ajo sjell një zë të freskët dhe angazhim të vazhdueshëm në pasqyrimin e problematikave sociale dhe zhvillimeve aktuale, duke qenë afër komunitetit dhe duke raportuar me saktësi e profesionalizëm.
Komente