Zëvendësministri i Brendshëm, Besfort Lamallari, prezantoi sot në Komisionin për Çështjet Ligjore, Administratën Publike dhe të Drejtat e Njeriut projektligjin “Për kontrollin e kufirit shtetëror”, i cili synon forcimin e sigurisë kufitare dhe përputhjen me standardet e Bashkimit Evropian.
Gjatë fjalës së tij, Lamallari theksoi se nisma është pjesë e përmbushjes së objektivave afatgjatë në kuadër të politikës së jashtme, sigurisë dhe integrimit evropian të vendit.
“Sjell një përafrim të ndjeshëm me kuadrin ligjor të BE-së dhe standardet e Schengenit, duke përfshirë përforcimin e mbikëqyrjes së kufijve, luftën kundër krimit kufitar dhe parandalimin e migracionit të paligjshëm”, u shpreh Lamallari.
Projektligji synon gjithashtu rritjen e sigurisë në zonat e verifikimit kufitar, përmirësimin e sistemit të kontrollit në bregdet dhe kapaciteteve të kërkim-shpëtimit në det. Po ashtu, përcaktohen qartë rregullat për qarkullimin lokal kufitar dhe krijimin e qendrës kombëtare për menaxhimin e integruar të kufirit.
Zv/ministri rikujtoi se Shqipëria është vendi i parë në rajon që ka nënshkruar marrëveshje me agjencinë evropiane Frontex për dislokimin e trupave në kufijtë shqiptarë, duke theksuar rëndësinë e këtij bashkëpunimi për sigurinë dhe integrimin.
Sipas Lamallarit, projektligji është një hap i rëndësishëm për forcimin e sigurisë kombëtare dhe përafrimin e mëtejshëm të legjislacionit shqiptar me acquis të Bashkimit Evropian.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente