Parku Natyror i Porto Palermos është një nga thesaret më të çmuara të bregdetit shqiptar. I rrethuar nga ujërat e kristalta të detit Jon dhe natyra e paprekur, ky destinacion është kthyer në një pikë referimi për vizitorët vendas dhe të huaj.
Përveç bukurisë natyrore, Porto Palermo ofron një përvojë unike përmes historisë dhe artit. Kalaja historike e ndërtuar nga Ali Pashë Tepelena në fillim të shekullit të 19-të, si dhuratë për bashkëshorten e tij Vasiliqinë, është kthyer në një skenë të jashtëzakonshme kulturore.
Në këtë monument historik do të zhvillohet së shpejti edicioni i pestë i Porto Palermo Festival, i ideuar nga violinisti i njohur Olen Cesari. Festivali mbledh çdo vit artistë virtuozë nga e gjithë bota dhe e kthen kalanë në një skenë magjike ku tingujt përzihen me historinë dhe natyrën.
Arkitektura mbresëlënëse e kalasë, me muret e saj mbrojtëse dhe kullat që shohin drejt horizontit të pafund, e bën përvojën edhe më të paharrueshme. Pamja ku qielli takon detin ofron një sfond ideal për artin, kulturën dhe relaksin.
Porto Palermo është shumë më tepër se një destinacion turistik – është një përvojë që bashkon trashëgiminë historike, pasurinë natyrore dhe shpirtin artistik.
Komente