Forca të shumta policie rrethuan mbrëmjen e sotme godinën ku ndodhet redaksia e News24 dhe mediave të tjera të të njëjtit grup, duke mos lejuar hyrjen e gazetarëve dhe punonjësve. Hyrja kryesore e ndërtesës është bllokuar, ndërsa stafi i mediave është privuar nga ushtrimi i detyrës.
Gazetarët pretendojnë se veprimet janë kryer pa vendim gjykate dhe pa njoftim paraprak, duke i cilësuar si arbitrare.
Shoqëria “KAYO” dhe konflikti për godinën
Ambientet ku operojnë News24, Panorama, BalkanWeb dhe Gazeta Shqiptare i kanë kaluar shoqërisë “KAYO”, e krijuar me një vendim të qeverisë për aktivitet në fushën e prodhimit dhe tregtimit të armëve. Drejtor i kësaj shoqërie është Ardi Veliu, ish-Drejtori i Përgjithshëm i Policisë së Shtetit.
Sipas vendimit qeveritar, “KAYO” do të shfrytëzojë ambientet e ish-Uzinës së Autotraktorëve, hapësirë ku prej mbi dy dekadash funksionojnë redaksitë e mediave të grupit, në bazë të kontratave të lidhura me qeveritë e mëparshme.
Operacioni dhe përshkallëzimi i situatës
Operacioni policor, i drejtuar personalisht nga Ardi Veliu, ka pasur si synim largimin e stafit të mediave nga godina. Situata është tensionuar më tej pas ndërprerjes së furnizimit me energji elektrike, duke paralizuar aktivitetin redaksional.
Autoritetet nuk kanë dhënë ende një deklaratë zyrtare mbi bazën ligjore të ndërhyrjes. Ndërkohë, gazetarët dhe organizatat e medias e konsiderojnë këtë veprim si një precedent të rrezikshëm për lirinë e shtypit në vend.
Komente