Policia Kufitare e Vlorës ka ndërhyrë në kohë për të ndihmuar 8 pushues që kishin mbetur në det të hapur për shkak të problemeve me mjetet e tyre lundruese, në dy raste të ndara të regjistruara në zonën bregdetare të Vlorës.
Ndërhyrja në Shën Jan
Sipas njoftimit zyrtar, SPK Triport u njoftua për një gomone me 4 shtetas në bord, e cila kishte pësuar defekt rreth 1 milje larg zonës së Shën Janit. Menjëherë, mjeti i Policisë Kufitare u nis drejt vendit të ngjarjes dhe bëri të mundur shoqërimin e sigurt të gomones dhe personave në bord në stacionin më të afërt. Fatmirësisht, të gjithë ndodheshin në gjendje të mirë shëndetësore.
Rasti i dytë në Porto Palermo
Një tjetër ndërhyrje u krye nga SPK Dhërmi, pas sinjalizimit për 4 shtetas që po lundronin me kanoe në plazhin e Porto Palermos, të cilët ishin bllokuar në det dhe nuk mund të ktheheshin në breg. Edhe në këtë rast, mjeti lundrues i Policisë Kufitare reagoi menjëherë, duke transportuar të sigurt drejt bregut 4 pushuesit, të cilët ishin në gjendje të mirë.
Siguri dhe gatishmëri gjatë sezonit turistik
Policia Kufitare e Vlorës apelon për kujdes të shtuar gjatë përdorimit të mjeteve lundruese, veçanërisht nga persona të paautorizuar ose të papajisur me mjetet e nevojshme të sigurisë.
Në kuadër të sezonit turistik, strukturat e Policisë janë në gatishmëri të plotë për të garantuar sigurinë e jetës në det dhe për të reaguar ndaj çdo rasti emergjence në ujërat bregdetare.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente