Shërbimet e Policisë së Himarës kanë ndërhyrë mbrëmjen e sotme për t’i ardhur në ndihmë tre turistëve të huaj, të cilët kishin mbetur të bllokuar në një zonë të thepisur shkëmbore, në plazhin e Akuariumit.
Pas marrjes së njoftimit, patrulla e rendit me shërbim në zonën e Jalës shkoi menjëherë në vendngjarje dhe nisi kërkimet në terren. Turistët u lokalizuan shpejt dhe u nxorën nga zona ku kishin mbetur të bllokuar.
Fatmirësisht, të tre ndodhen në gjendje të mirë shëndetësore dhe kanë falënderuar shërbimet e Policisë për reagimin e menjëhershëm dhe profesionalizmin e treguar.
Drejtoria Vendore e Policisë Vlorë bën të ditur se strukturat e saj vijojnë të jenë të pranishme 24 orë në 7 ditë, për garantimin e sigurisë së pushuesve dhe për ndërhyrje në çdo situatë emergjente.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente