"Pica, pasioni dhe perëndimet në bregdet - Shefi italian Errico Porzio e sheh Shqipërinë si destinacion të ri"

Mjeshtri i njohur i picës napolitane, Errico Porzio, ka qenë së fundmi i ftuar në restorantin “Gjurma” të shefit të njohur Aldo Mehmeti, ku ndau me kolegët shqiptarë përvojën dhe filozofinë e tij rreth artit të picës.

“Isha aty për të vlerësuar dhe për të dhënë disa këshilla për përmirësimin e brumit – që të jetë më afër picës tradicionale napolitane dhe më pak asaj moderne,” – u shpreh Porzio për BluTV. Ai shpjegoi se brumi u riformulua, u pasurua me miell krunde dhe u bë më i hidratuar, duke u përshtatur me çdo lloj gatimi, pa u larguar nga shpirti napolitan që e frymëzon.

Ky përkushtim ndaj traditës, i shoqëruar me aftësinë për ta përditësuar atë, është vlerësuar edhe në një video të shpërndarë në TikTok dhe në faqet zyrtare të BluTV, ku mjeshtri thekson rëndësinë e fleksibilitetit të brumit pa kompromentuar thelbin e origjinës.

Vizita në Shqipëri ishte e para për Porzion, por përshtypjet ishin të forta. “Tirana është një qytet europian, që në shumë drejtime i ngjan metropoleve të tjera. Puna në zonat në zhvillim po ecën me ritme vërtet të shpejta,” – tha ai, ndërsa për jugun e Shqipërisë shprehu admirim, duke e krahasuar me destinacione si Greqia, Spanja apo Italia, edhe në aspektin e infrastrukturës dhe pritjes për turistët.

Porzio nuk kurseu fjalët e mira për ushqimin dhe mikpritjen shqiptare. “Ndihesha si në shtëpi. Shërbimi ishte i kujdesshëm, pastërtia e admirueshme dhe ushqimi i përgatitur me shumë dashuri. Kjo tregon përkushtim të vërtetë,” – u shpreh ai.

Ndërkohë, rrjeti i tij i picerive në Itali është në zgjerim të vazhdueshëm, me dy pika të reja që pritet të hapen së shpejti në Palermo dhe Catanzaro, duke e çuar në 18 numrin e total të lokaleve të tij – të gjitha të përqendruara në jug të Italisë, me përjashtim të njërit në Milano.

Ndër vendet ku mund të zgjerohet edhe jashtë Italisë, përmendet Madridi, por Porzio nuk e përjashton mundësinë për të hapur një piceri edhe në Tiranë. “Unë besoj në punësimin vjetor dhe stabilitetin për stafin. Shqipëria ka shumë potencial dhe do të doja të rikthehesha, edhe në Vlorë, bashkë me familjen,” – tha ai.

Megjithatë, mjeshtri napolitan vuri re një detaj që i ra në sy gjatë qëndrimit të tij: çmimet e larta të picës. “13 euro për një Margherita janë çmime më shumë për Milano sesa për Napoli. Në Napoli kushton 6 euro, në Tiranë 8. Kjo më duket e tepruar,” – tha ai me një buzëqeshje.

Në fund të intervistës, ai ndau me BluTV një fotografi të një perëndimi spektakolar nga bregdeti shqiptar – një pamje që, sipas tij, do ta bënte të rikthehej me dëshirë. Gastronomia dhe mikpritja shqiptare, siç thotë vetë mjeshtri, kanë gjithçka për të lënë gjurmë.