Pesë të vdekur dhe dhjetëra të zhdukur pas fundosjes së tragetit në Bali

Të paktën pesë persona kanë humbur jetën dhe dhjetëra të tjerë janë të zhdukur pas fundosjes së një trageti pranë ishullit turistik të Bali-t në Indonezi, njoftuan ekipet e shpëtimit.

Trageti po transportonte 53 pasagjerë dhe 12 anëtarë ekuipazhi kur u fundos në orën 23:20 me kohën lokale (15:35 GMT) të mërkurën, gjatë rrugës nga Banyuwangi në bregun lindor të ishullit Java drejt Bali-t, njoftoi Zyra e Agjencisë Kombëtare të Kërkimit dhe Shpëtimit në Surabaya. Deri tani, 31 persona janë shpëtuar, ndërsa kërkimet për të zhdukurit vazhdojnë.

Shumica e të mbijetuarve janë banorë të qytetit bregdetar Banyuwangi, ndërsa të tjerë vijnë nga zonat më të thella të ishullit Java, sipas listës së publikuar nga autoritetet.

Një prej të mbijetuarve, Imron nga Banyuwangi, rrëfeu se trageti u rrokullis pas tri tundjeve të forta. “Në tundjen e tretë, uji i detit kishte hyrë brenda kabinës së pasagjerëve,” tha ai. Imron arriti të notonte përmes një vrime në traget dhe të gjente një jelek shpëtimi, para se të shpëtohej nga një peshkatar.

Një tjetër i mbijetuar, Bejo Santoso, u hodh në kohë nga trageti dhe arriti të kapte një jelek shpëtimi. “Rreth tri minuta pasi anija nisi të përplasej, ajo u përmbys. Unë pata kohë të hidhesha,” tha ai për agjencinë e lajmeve Antara.

Presidenti Prabowo Subianto ka urdhëruar një përgjigje të menjëhershme emergjente, ndërsa ndodhet në një vizitë zyrtare në Arabinë Saudite.

Rruga e tragetit, që lidh ishujt Java dhe Bali, është një nga më të frekuentuarat në Indonezi, dhe përdoret shpesh nga vendasit.

Fotot e publikuara nga agjencia Antara treguan ambulanca në gatishmëri dhe banorë të vendosur pranë rrugës duke pritur për lajme.

Aksidentet detare janë të shpeshta në Indonezi, një arkipelag me rreth 17,000 ishuj, ku zbatimi i ligjeve të sigurisë shpesh mbetet një sfidë.

Në mars të këtij viti, një grua australiane humbi jetën pas fundosjes së një anijeje me 16 persona pranë Bali-t.