Parashikimi 5-vjeçar - Nxehtësi rekord dhe mot ekstrem kërcënojnë planetin

Temperaturat globale pritet të arrijnë nivele rekord ose pranë rekordit gjatë pesë viteve të ardhshme, duke shtuar rrezikun e motit ekstrem dhe valëve të nxehtësisë me pasoja fatale. Paralajmërimi vjen nga një raport i përbashkët i Organizatës Botërore Meteorologjike (WMO) dhe Zyrës Meteorologjike të Mbretërisë së Bashkuar (UK Met Office).

Sipas raportit, ka një probabilitet prej 70% që ngrohja globale të tejkalojë përkohësisht kufirin prej 1.5 gradë Celsius gjatë kësaj periudhe – një prag që, nëse kapërcehet, rrit ndjeshëm rreziqet për ndikime të forta në klimë, përfshirë shkrirjen e akullnajave dhe rritjen e nivelit të detit.

Shkencëtarët paralajmërojnë se sistemi klimatik mund të arrijë “pikën e kthesës” – një moment kritik pas të cilit pasojat bëhen të pakthyeshme. Për herë të parë, raporti ngre edhe mundësinë, ndonëse të vogël (1%), që një nga vitet e ardhshme të ketë temperaturë mesatare globale 2 gradë më të lartë krahasuar me epokën paraindustriale.

Gjithashtu, ekziston një gjasë 80% që të paktën një vit brenda këtij 5-vjeçari të jetë më i ngrohti i regjistruar ndonjëherë.

“Fatkeqësisht, raporti nuk jep asnjë shenjë lehtësimi për vitet në vijim, dhe kjo nënkupton ndikime gjithnjë e më të mëdha negative për ekonomitë tona, jetën e përditshme, ekosistemet dhe planetin”, u shpreh zëvendëssekretarja e përgjithshme e WMO, Ko Barrett.

Në raport theksohet gjithashtu se ngrohja në Arktik po përparon me një ritëm mbi 3.5 herë më të shpejtë se mesatarja globale gjatë dimrit polar, duke e kthyer rajonin në një ndër zonat më të prekura nga ndryshimet klimatike.

Ngrohja e planetit drejt kufirit 1.5 gradë e afron botën me tejkalimin e objektivave të Marrëveshjes së Parisit, të cilën shumë shtete, sidomos ato ishullore të ulëta, e konsiderojnë çështje jetike për mbijetesën.