Një situatë e rrezikshme u shmang mbrëmjen e sotme në shetitoren e qytetit bregdetar të Sarandës, falë ndërhyrjes së shpejtë dhe efikase të forcave të rendit.
Një shtetas i huaj, me origjinë italiane, u pa duke lëvizur me një thikë në dorë mes turmës së qytetarëve dhe pushuesve që ndodheshin në bulevard. Prania e armës së ftohtë në një zonë të mbipopulluar shkaktoi panik dhe shqetësim të madh mes kalimtarëve.
Policia ndërhyri në kohë, duke neutralizuar turistin pa shkaktuar lëndime apo incidente të tjera. I dyshuari u shoqërua në Komisariatin e Policisë së Sarandës, ku po merret në pyetje dhe po punohet për zbardhjen e plotë të rrethanave të ngjarjes.
Sipas burimeve zyrtare, i dyshuari është identifikuar si Th. M., 32 vjeç, nga Perugia, Itali, i cili ndodhej në Sarandë me pushime. Policia bën me dije se ai ishte në gjendje të dehur dhe dyshohet për probleme të mundshme të shëndetit mendor.
Deri tani nuk raportohet për persona të lënduar.
BluTV do të ndjekë me vëmendje zhvillimet e mëtejshme për këtë ngjarje.
Komente