Një ngjarje e rëndë ka ndodhur dy ditë më parë në Përmet, ku një vajzë 26-vjeçare, L.A., ka rënë pre e pickimit helmues të një gjarpri. Pas incidentit, e reja është çuar menjëherë në Spitalin e Përmetit për ndihmën e parë mjekësore. Sipas burimeve nga spitali, ajo ka pasur simptoma të rënda, ndërsa helmi i gjarprit ishte përhapur shpejt në trupin e saj.
Për shkak të mungesës së antidotit në Spitalin e Përmetit, e reja është nisur urgjentisht për në Spitalin Rajonal të Gjirokastrës, ku po ashtu ka rezultuar që antidoti që mund të shpëtonte jetën e saj mungonte. Pas disa orësh shqetësimi dhe pasigurie, vajza është dërguar me urgjencë në Spitalin e Traumës në Tiranë, ku më në fund iu administrua ilaçi kundërhelm.
Familjarët e vajzës kanë shprehur falenderime të mëdha për mjekët që ndërhynë në momentin e duhur, duke nënvizuar se vetëm për shkak të vonesave dhe mungesës së antidotit në spitalet rajonale, ajo shpëtoi këmbën e saj nga amputimi. Ata kanë theksuar gjithashtu se helmi i gjarprit kishte depërtuar deri në kofshë, dhe nëse do të kishte kaluar më shumë kohë, pasojat mund të ishin të rënda.
Ky rast ka nxjerrë në pah një problem të theksuar që ka të bëjë me mungesën e kundërhelmëve të nevojshëm në spitalet e Qarkut të Gjirokastrës, për të cilat ka pasur disa ankesa nga qytetarët dhe profesionistët e shëndetësisë. Në një zonë ku temperaturat e larta të verës shpesh shkaktojnë rritje të incidencës së gjarpërinjve, spitalet e këtij qarku, të cilat shërbejnë për rreth 134,000 banorë, nuk kanë një antidot të mjaftueshëm për të trajtuar rastet e pickimeve helmues.
Ky incident ka ngritur shqetësimin mbi përgatitjen e spitaleve rajonale për të përballuar emergjencat, duke bërë apel për një reagim të shpejtë nga autoritetet shëndetësore për të siguruar furnizimin me ilaçet e nevojshme për të shpëtuar jetë.
15 vite eksperience pune ne media audiovizove. Puna ne terren pasioni i saj.
Komente