Kryeministri i Izraelit, Benjamin Netanyahu, ka bërë një thirrje të drejtpërdrejtë për qytetarët iranianë, duke i ftuar ata të kundërvihen ndaj regjimit aktual dhe të ngrihen për lirinë e tyre. Deklarata vjen pas një vale sulmesh ajrore mes Izraelit dhe Iranit, të cilat kanë rritur ndjeshëm tensionet në rajon.
Në një fjalim të fortë, Netanyahu theksoi se objektivi i ofensivës izraelite nuk janë civilët, por regjimi islamik në Teheran. Ai deklaroi se operacioni ushtarak ka për qëllim të pengojë kërcënimin bërthamor dhe balistik të Iranit ndaj Izraelit.
“Regjimi nuk e di se çfarë e ka goditur, ose çfarë do ta godasë. Nuk ka qenë kurrë më i dobët,” tha Netanyahu, duke nënvizuar se një pjesë e madhe e arsenalit të raketave balistike të Iranit dhe një nga objektet kryesore të pasurimit të uraniumit janë asgjësuar.
Ai i bëri thirrje popullit iranian që të ngrihet kundër shtypjes:
“Ka ardhur koha që populli iranian të bashkohet rreth flamurit dhe trashëgimisë së tij historike, duke u ngritur në këmbë për lirinë e tij nga regjimi i lig dhe shtypës.”
Kjo deklaratë vjen në një moment delikat për Lindjen e Mesme, teksa komuniteti ndërkombëtar po bën thirrje për vetëpërmbajtje dhe dialog për të shmangur një përshkallëzim të mëtejshëm të konfliktit.
Komente