Kryeministri izraelit Benjamin Netanyahu ka lënë të hapur mundësinë e eliminimit fizik të udhëheqësit suprem iranian, Ajatollah Ali Khamenei, duke deklaruar se një veprim i tillë do të përfundonte përfundimisht konfliktin midis dy vendeve.
Netanyahu e krahasoi Khamenein me një “Hitler modern” dhe mbrojti agresionin ushtarak të Izraelit ndaj Iranit si “të justifikuar për të shkatërruar rrezikun bërthamor”.
“E ashtuquajtura luftë e përjetshme është ajo që dëshiron Irani. Por ne nuk po e përshkallëzojmë konfliktin – ne po e përfundojmë atë,” tha Netanyahu. “Izraeli po parandalon një luftë bërthamore dhe po i kundërvihet forcave të së keqes.”
I pyetur për raportimet se ish-presidenti amerikan Donald Trump kishte ndaluar më parë një plan të ngjashëm për të vrarë Khamenein nga frika e përshkallëzimit, Netanyahu ishte i prerë: “Ne po bëjmë atë që duhet të bëjmë.”
Ndërkohë që Izraeli vazhdon sulmet ajrore ndaj objektivave në Iran dhe Republika Islamike kundërpërgjigjet me raketa, Netanyahu po përpiqet të forcojë aleancën me SHBA-në përmes intervistave të gjata me mediat amerikane. Ai e paraqiti përballjen me Iranin si një “betejë e qytetërimit kundër barbarisë.”
Në të njëjtën ditë, Donald Trump publikoi në rrjetin e tij Truth Social: “Irani duhet ta kishte firmosur marrëveshjen që u thashë. Sa turp dhe çfarë humbjeje jete njerëzore. Thjesht: IRANI NUK MUND TË KETË NJË ARMË BËRTHAMORE.”
Ndërsa tensionet rriten, ushtria izraelite ka lëshuar paralajmërime për evakuim të banorëve në një lagje të Teheranit, një taktikë e ngjashme me atë që ka përdorur më parë në Gaza. Paralajmërimi vjen në një kohë kur në kryeqytetin iranian jetojnë afro 10 milionë banorë.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente