Kryeministri izraelit Benjamin Netanyahu ka deklaruar se Izraeli “nuk ka zgjidhje tjetër përveçse të përfundojë punën dhe të mposhtë plotësisht Hamasin”, duke mbrojtur planin për një ofensivë të re ushtarake në Gaza.
Duke folur për median e huaj nga Jerusalemi të dielën, Netanyahu theksoi se synimi nuk është pushtimi i Gazës, por “çlirimi i saj”. Ai shtoi se objektivat përfshijnë çmilitarizimin e territorit, kontrollin e sigurisë nga ushtria izraelite dhe krijimin e një administrate civile jo-izraelite.
Kryeministri pranoi se ekziston një “afat relativisht i shkurtër” për hapat e ardhshëm dhe akuzoi Hamasin për shumë prej problemeve të Gazës, përfshirë viktimat civile, shkatërrimin dhe mungesën e ndihmave.
Netanyahu tha gjithashtu se ka urdhëruar ushtrinë izraelite të lejojë hyrjen e më shumë gazetarëve të huaj në Gaza, një zhvillim i pazakontë pasi deri më tani hyrja është lejuar vetëm në kuadër të misioneve ushtarake të mbikëqyrura.
Ky zhvillim vjen mes kritikave të shumta brenda dhe jashtë Izraelit për planin e qeverisë, të cilin Netanyahu e quan “një kundërpërgjigje ndaj një fushate globale gënjeshtrash”.
Komente