Ikona e kinemasë franceze dhe figura e njohur ndërkombëtare e artit dhe aktivizmit, Brigitte Bardot, ka ndërruar jetë në moshën 91-vjeçare. Lajmi u bë i ditur përmes një deklarate zyrtare të Fondacionit “Brigitte Bardot”.
Në deklaratë theksohet se Bardot ishte një aktore dhe këngëtare me famë botërore, e cila në kulmin e suksesit artistik vendosi të tërhiqej nga skena për t’ia kushtuar jetën mbrojtjes së kafshëve dhe angazhimit në fondacionin që ajo vetë themeloi. Nuk janë dhënë detaje mbi kohën apo vendin e vdekjes së saj.
Brigitte Bardot mbetet një figurë simbol e kinemasë franceze të shekullit XX, si dhe një zë i fortë i aktivizmit për të drejtat e kafshëve, kauzë së cilës ajo iu përkushtua për dekada pas largimit nga arti.
Rruga e saj në botën e kinemasë nisi herët, pasi u vu re nga bashkëpunëtorë të regjisorit Marc Allégret dhe më pas nga Roger Vadim, i cili e orientoi drejt studimeve për aktrim. Bashkëpunimi i tyre profesional u shndërrua edhe në një lidhje personale, që do të kishte ndikim të rëndësishëm në karrierën e saj artistike.
Debutimin në kinema Brigitte Bardot e bëri në vitin 1952 me filmin “Le trou normand” të regjisorit Jean Boyer, po atë vit kur u martua me Roger Vadim. Brenda një periudhe të shkurtër ajo fitoi famë në Francë dhe më gjerë, fillimisht në role dytësore dhe më pas si protagoniste në një sërë filmash të njohur.
Ndër veprat më të hershme të karrierës së saj përfshihen “Manina donna senza veil” (1952), “Ligji i Dashurisë” (1953), “Tradhtari” (1954), “Djali i Caroline Cherie” (1955), “Vajzat e çmendura” (1955), “Një mjek në lartësitë e deteve” (1955) dhe “Manovrat e mëdha” (1955), duke e konsoliduar atë si një nga emrat më të rëndësishëm të kinemasë evropiane të kohës.
Trashëgimia e Brigitte Bardot mbetet e gjallë si në historinë e filmit, ashtu edhe në fushën e mbrojtjes së kafshëve, ku ajo u shndërrua në një simbol ndërkombëtar të angazhimit dhe ndërgjegjësimit publik.
Komente