Mund të mbyllen kapitujt e BE-së deri në 2027? Banka e Shqipërisë: Po, por kërkohet punë intensive

Shqipëria po hyn në një fazë vendimtare në rrugën drejt anëtarësimit në Bashkimin Evropian, me objektivin ambicioz për të mbyllur kapitujt e negociatave deri në vitin 2027.

Një ndër institucionet kyçe në këtë proces është Banka e Shqipërisë, e cila luan një rol të drejtpërdrejtë në 9 kapituj të negociatave, në dy prej të cilëve si institucioni udhëheqës. Zëvendësguvernatorja e dytë, Natasha Ahmetaj, shprehet se objektivi është i arritshëm, por kërkon angazhim të jashtëzakonshëm krahas detyrave të përditshme.

“2027-a është një objektiv i realizueshëm, por kërkon punë të sforcuar”, thekson Ahmetaj.

Sipas saj, përparimi drejt anëtarësimit është i mundur vetëm nëse Shqipëria përmbush të gjitha kushtet teknike, përfshirë edhe standardet e organizatës ndërkombëtare Moneyval, që lidhen me parandalimin e pastrimit të parave dhe lëvizjen e lirë të flukseve financiare.

Pritshmëri të mëdha për përfitimet ekonomike
Zëvendësguvernatorja thekson se anëtarësimi në BE do të sillte përfitime të drejtpërdrejta për ekonominë shqiptare, bizneset dhe qytetarët, duke integruar vendin në një treg të madh dhe konkurrues.

Një nga zhvillimet konkrete në këtë drejtim është përfshirja e Shqipërisë në Zonën Unike të Pagesave në Euro (SEPA). Tashmë, të gjitha bankat kanë aplikuar dhe janë pranuar në këtë sistem. Ahmetaj bën të ditur se nga 5 tetori 2025, transaksionet me standardet SEPA do të jenë të zbatueshme, duke ulur ndjeshëm kostot për dërgimin dhe marrjen e parave në euro.

Një proces teknik, por vendimtar
Banka e Shqipërisë mbetet e përfshirë në mënyrë të vazhdueshme në përgatitjen e kornizave monetare dhe financiare që përmbushin kriteret e BE-së. Kjo punë e pandërprerë, megjithëse shpesh pa jehonë publike, është vendimtare për ndërtimin e një sistemi financiar të qëndrueshëm dhe të përshtatur me standardet europiane, që do të mbështesë Shqipërinë në momentin e anëtarësimit të plotë.