Mrekullia e Vogël Rifillon Përgatitjen e Vakteve për Njerëzit në Nevojë në Vlorë

nga Carmela Pagliuca

Mrekullia e Vogël, një shoqatë vullnetarësh multietnike që kujdeset për të ofruar mbështetje ushqimore për njerëzit në nevojë ka rifilluar sot përgatitjen e vakteve pas një periudhe pushimi. Këtë mëngjes, vullnetarët e shoqatës po japin ndihmën e tyre për përgatitjen e vakteve në mensën e Kishës Katolike të qytetit të Vlorës.

Ideatori, Vasilli, së bashku me vullnetarë italianë, rumunë, shqiptarë e brazilianë, kontribuojnë me vetëfinancim për të ndihmuar më pak fatlumët. Kontributi që jepet udhëhiqet nga dëshira për të bërë mirë ndaj atyre që kanë më shumë nevojë. I pyetur se çfarë ndjen kur bën mirë, Vasilli është përgjigjur: “Kur bën mirë ndjen diçka që nuk është e lehtë të shpjegohet, por në fund të ditës të bën të ndihesh mirë.”

Personat që bashkëpunojnë me shoqatën janë të paktën pesëdhjetë, të gjithë me një qëllim të përbashkët: të ndihmojnë të afërmin. Ata vetëfinancohen për të blerë produktet bazë të nevojshme për përgatitjen e rreth 300 vakteve që shpërndahen dy herë në muaj. Janë shumë njerëz që nuk kanë mundësi as për një vakt të vetëm. Këtu Vasilli flet për “persona të përulur, shumë të rezervuar. Jemi ne që i kërkojmë për t’u dhënë kontributin tonë të vogël.”

Vasilli dhe të gjithë anëtarët e shoqatës Mrekullia e Vogël u bëjnë thirrje njerëzve për çdo lloj mbështetjeje që të mund të vazhdojnë të bëjnë mirë, ndërsa institucioneve u kërkojnë të identifikojnë ambiente për t’u rikonstruktuar në mënyrë që të krijohet një mensë e qëndrueshme për të ndihmuar njerëzit në nevojë.

Gjithashtu, Vasilli shpreson në një bashkëpunim të frytshëm e të qëndrueshëm midis klerit dhe laikëve, pasi i bashkon një interes i përbashkët: të bëjnë mirë duke mbështetur ata që kanë më shumë nevojë.

Në përfundim të intervistës, Vasilli thotë:
“Ne nuk mund t’i ndihmojmë të gjithë, por të gjithë mund të ndihmojmë dikë.”