Një vatër e sëmundjes së murtajës ka shpërthyer në zonën e Libohovës, duke vënë në alarm autoritetet veterinare dhe blegtorët e zonës. Sipas burimeve zyrtare, janë identifikuar rastet e para të infeksionit dhe menjëherë janë vendosur në karantinë 256 krerë bagëti të imta, për të frenuar përhapjen e sëmundjes.
Specialistët e shërbimit veterinar ndodhen në terren dhe kanë nisur zbatimin e protokolleve të emergjencës, përfshirë dezinfektimin e zonës dhe mbikëqyrjen e tufave të tjera në afërsi.
“Murtaja është një sëmundje shumë ngjitëse dhe potencialisht shkatërruese për sektorin blegtoral. Kemi marrë masat e para për izolimin dhe ndalimin e përhapjes,” thanë specialistët.
Blegtorët janë këshilluar të kufizojnë lëvizjen e bagëtive dhe të raportojnë menjëherë çdo rast të dyshuar tek shërbimi veterinar. Autoritetet theksojnë se bashkëpunimi me komunitetin lokal është thelbësor për të menaxhuar situatën dhe shmangur përhapjen në zona të tjera.
Thirrja për zbatim të udhëzimeve do të mbetet në fuqi deri në normalizimin e plotë të situatës në këtë zonë të njohur për aktivitetin e saj blegtoral.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente