Pas shumë pritjesh dhe diskutimesh, landfilli i Sherishtës ka hyrë zyrtarisht në fazën tre-mujore të testimit, duke nisur edhe depozitimin e mbetjeve urbane. Lajmi është konfirmuar nga Bashkia e Vlorës, e cila njofton se gjatë kësaj periudhe mbetjet do të vijojnë të grumbullohen dhe të trajtohen në këtë landfill të ri.
Kjo periudhë testuese është thelbësore për të vlerësuar funksionimin e plotë të landfillit dhe për të përcaktuar kalimin e tij në përdorim të përhershëm. Ndërkohë, një zhvillim pozitiv është se mbetjet, më në fund, nuk hidhen më në vendgrumbullime të përkohshme dhe të pakontrolluara, por po depozitohen në një hapësirë të dedikuar dhe të standardizuar.
Bashkia e Vlorës thekson se tre muajt e testimit janë të domosdoshëm për të siguruar një operim të qëndrueshëm dhe për të eliminuar çdo problematikë të mundshme në procesin e menaxhimit të mbetjeve. Nëse gjithçka do të shkojë sipas pritshmërive, mbetjet urbane do të vazhdojnë të depozitohen vetëm në landfillin e Sherishtës edhe pas përfundimit të kësaj faze prove.
Në planet e afërta parashikohet gjithashtu që landfilli të presë edhe mbetjet nga zona të tjera të qarkut, përfshirë Orikumin dhe Selenicën, duke e kthyer atë në një pikë kyçe të menaxhimit të mbetjeve për gjithë rajonin.
Një hap i vonuar, por i domosdoshëm, drejt një menaxhimi më të civilizuar të mbetjeve në Vlorë.
Efrosina Papa, gazetare me një karrierë 26-vjeçare në median e Vlorës, është një zë i dalluar i informimit lokal, që ka ndërtuar me përkushtim urën mes qytetarëve dhe ngjarjeve të ditës. Ajo është e njohur për pasqyrimin e drejtë dhe të ndershëm të realitetit, me vëmendje të veçantë ndaj historive njerëzore dhe figurave punëtore të komunitetit.
Komente